Ekisodha 27 - Bhibhiliya Nya Guage

Giluvelo nya miphaso nya guvbiswe

¹ “U na gira gimbe giluvelo khu mapulango nya simbo nya sena. Gulapha nya giluvelo u na pima livbandre mikono, guanama gambe u na pima livbandre mikono. Giluvelo gi na bani giri ni maphuvbo mana nya idzosaye gulapha. Gukhugega u na pima mikono miraru.

² Dzikhonani dza dzina u na vega dzikeho dzina dzi hungana dzi khala gilo gimwegyo basi ni giluvelo, u dzi londra khu sugu.

³ U na gira gambe sombo nya gu si thumise gu wola khiso nguma vbagiluvelotunu, mafosola, mikho nya guwole khiyo nilo ni dzimbiya ni sikalango nya guthele magala. Sombo sesi satshavbo u na si gira khu sugu.

⁴ U na gira gambe gihuto nya giluvelo khu sugu, dzitshokhani dza dzina nya gihuto u na vega masindra mana nya sugu.

⁵ Gihuto gegi u na gi ladza khu vbavbatshi gi dzundrulugela giluvelo gi gwela kala vbakari nya giluvelo.

⁶ U na gira gambe mipingo nya simbo nya sena u yi londra khu sugu.

⁷ Mipingo yeyi u na mi bedza umo nya masindra ma guromo umo nya maphuvbo ya mavili nya giluvelo gasi gu gi rwala khiyo.

⁸ Giluvelo gi na girwe khu mapulango nga ngasa yiri liphanga khu ndrani, nga idzo nyi gu nonedzidego khidzo gigomoni, u na gira kharato.”

Likupakupa nya Tshatsha nya guage

⁹ Khu gulandrela, u na vbaha likupakupa nya Tshatsha nya guage. Khu phuvbo ga Marandzi nya likupakupa, li na bhiywe khu myendra nya gumbure gipimo nya lizana mikono khu ndzari mweyo.

¹⁰ Ndzari yeyi gambe yi na bani yiri ni magumavili madingo ma tsitsidwego vbadzitshinatunu nya sugu. Sikhwetedzo nya madingo gumogo ni mitalatsi yakone khya parata.

¹¹ Gu na girwa idzosaye khu phuvbo ga Wuronga, u ghwimba mwendra gipimo nya lizana mikono gulapha, u vega magumavili madingo ni dzitshina dzakone nya sugu, sikhweletedzo ni dzimbano dzakone, u gira nya parata.

¹² Khu phuvbo ga Muhwadambo, guanama nya likupakupa, u na ghwimba livbandre magumi mikono nya myendra, madingo ma manega ni likhumi mikono, ni dzitshina dzakone nidzo likhumi mikono.

¹³ Khu phuvbo ga Khugadambo, guanama nya likupakupa gu na ningana livbandre magumi mikono.

¹⁴ Khu phuvbo mwedo ga nyangwatunu gu na manega likhumi na livbandre mikono nya myendra, madingo mararu ni dzitshina dzitharu.

¹⁵ Gipandre nya wuvili nigyo gi na dzega livbandre mikono nya myendra ni madingo mararu ni dzitshina dzakone.

¹⁶ Nyangwani gakone, u na ghwimba myendra nya magumavili mikono gulapha nya muvala wa damboni, ni giwunguwungu, ni guvbyuga ni seda; wu na lugwa gwadi wu mburisedwa khu thumo nya wumeseri. Gu na girwa ni madingo yakone nya mana ni dzitshina dzakone dza dzina.

¹⁷ Madingo yatshavbo ma tshanganisago likupakupa ma na hungwa khu mitalatsi nya parata, sikhweletedzo saye si na bani siri sa parata, aholu dzitshina, khya sugu.

¹⁸ Likupakupa gu vbwetega na liri ni lizana mikono gulapha; guanama livbandre magumi mikono khu maphuvbo yatshavbo; ni livbandre gukhugega; myendra yaye nari ya wumburi nya gulugedwe khu linyu, dzitshina dzaye nari dza sugu.

¹⁹ Sombo satshavbo si na thumelago Wulangani nya Guage, dzimbano dzaye dzatshavbo, ni dzimbano dzatshavbo nya likupakupa si na bani siri sa sugu.

Mafura nya gidzigaredzo nya dzikandriya

²⁰ “U na ruma sanana sa Israyeli si gu resela mafura nya guhutwe nya mihandro nya miolivha, gasi guta khondrisa khayo dzikandriya, dzi khondra gikhati gyatshavbo nyamba tshimega.

²¹ Aroni ni sanana saye va na sayisa wenengedzo wowu umo nya Tshatsha nya Tshangano khu vbavbandze nya mwendra wu na bhiyago makhuvini nya gidzumeledzwano. Dzikandriya dzi na wenengedza mbeli ga Pfhumu Nungungulu, gukhugela gupfola nya lidambo kala gugya. Nayo yoyu, wu fanede gu sayiswa khu sanana sa Israyeli ni situgulwana sawe gikhati gyatshavbo kala gupindruga.”