Ekisodha 24 - Bhibhiliya Nya Guage

Gidzumeledzwano gya Nungungulu ni Israyeli

¹ Nungungulu a di embela Mosi, khuye: “Lita ga Pfhumu Nungungulu wago, uwe, Aroni, Nadhabhi, Abhiyu gumogo ni vale nya livbandre na mavili magumi madhota ya Israyeli; mu ta khidzima khu hwindzo.

² Mosi a na hidzimela ekha ga Pfhumu Nungungulu. Aholu avo kha va na nga hidzimela ambari vathu va nga liti naye gigomoni.”

³ Mosi a di wuya a ta embeledzela vathu magana yatshavbo a nga ganelago Pfhumu Nungungulu, ni sileletelo satshavbo; vathu va di hakha khu lito limwedo, khavo: “Ethu hi na landrisa magana yatshavbo aya a ganedego Pfhumu Nungungulu.”

⁴ Mosi a di lova magana yatshavbo ya Pfhumu Nungungulu. A di wuga ni dzimindru ngudzu, a gira giluvelo vbavbatshi nya gigomo, a di vbaha likhumi na mavili madingo, gukhedza khu likhumi na mavili mahundzu ya Israyeli.

⁵ A di rumela madzaha nya sanana sa Israyeli va ningela miphaso nya guvbiswe; va paya dzimombe, va gu ningela dzimhamba nya pwanano ga Pfhumu Nungungulu.

⁶ Mosi a di vbungula wumbe novba dzikhalini, wumbe a mitegedzela khuwo giluvelo.

⁷ A di dzega libhuku nya gidzumeledzwano a hevbula na gu pwidwa khu vathu, avo va hakha, khavo: “Satshavbo esi Pfhumu Nungungulu a ganedego, ethu hi na si gira ni gu si yingisa.”

⁸ Khu guralo, Mosi a di dzega novba a gu mitegedzela khuwo vathu, khuye: “Owu khu novba nya gidzumeledzwano egi Pfhumu Nungungulu a hungidego nanu khu magana yatshavbo yaya.”

Nungungulu a ngu dzi wonegisa ga Mosi

⁹ Mosi, Aroni, Nadhabhi, Abhiyu gumogo ni livbandre na mavili magumi madhota ya Israyeli va di lita gigomoni,

¹⁰ va ya wona Nungungulu wa Israyeli. Vbavbatshi nya migondro yaye gu di romo gilo nya gufanane ni giwindri nya guvatwe nya safira, nya guphatime kha nga ndzadzini.

¹¹ Nungungulu kha bayisa khu mandza yaye sihathwa sesi nya sanana sa Israyeli; aholu si di wona Nungungulu si vbedza si hodza ni gu sela.

Mosi gumogo ni madhota va ngu gwela nyaluphye gigomoni

¹² Pfhumu Nungungulu a di embela Mosi, khuye: “Lita u ta eno gwangu tshokatunu nya gigomo; u na khala iyo gasi nyi gu ninga sivatu nya siwindri nyi lovidego avbo milayo ni sirumo u fanedego gu va hevbudza.”

¹³ Mosi a di khuga ni githumi gyaye Josuwa va gwela gigomo gya Nungungulu.

¹⁴ A di embela madhota, khuye: “Enu hi vireleni avba kala hi wuya hi ta mi mana. Aroni ni Huri va na tshala nanu; muthu watshavbo a na gu bani nari ni mahungu a na ma bikela gwawe.”

¹⁵ Mosi na litide gigomoni, lipfhi li di fenengedza gigomo.

¹⁶ Khavbo avbo, wudhumo wa Pfhumu Nungungulu wu di ngangamela vbatshani nya gigomo gya Sinayi, lipfhi li di fenengedza gigomo livbandre na limwedo matshigu. Khu litshigu nya livbandre na mavili Pfhumu Nungungulu a di rana Mosi khu ndrani nya lipfhi.

¹⁷ Mahoni ga sanana sa Israyeli, wudhumo wa Pfhumu Nungungulu wu di wonega kha nga nilo wu dzurago vbatshani nya gigomo.

¹⁸ Mosi a di bela vbakari nya lipfhi a gu lita vbatshani nya gigomo. Mosi a di ya khala gigomoni gipimo nya magumana matshigu, wutshigu ni mihani.