Ekisodha 2 - Bhibhiliya Nya Guage

Guvelegwa gwa Mosi

¹ Mwama moyo nya lihundzu la Levhi, a di dzega nyamahegyane nya lihundzu la limwedo.

² Mwangadzi waye a di khura mimba a gu velega gyanana nya gikhwathana; khu gu gi wona gumbura ngudzu, a di gi siha a khala nagyo gipimo nya migima miraru.

³ Kha nga a nga bani a si kodzi gu simama gu gi siha matshigu nya gulaphe, a di luga gitataro nya dzimbosi a gi londra khu nyedzi a vega umo gyanana aya gi vega dzitshavani bambe nya tsongo.

⁴ Ndruye nya gyagadzyana wa gyanana a di khala khu hwindzo a gu khedzisela gasi gu wona ginani gi na gu dugelelago.

⁵ Khu gikhati gyogyo, nyamahegyane wa Faro a di relela tsongoni guya hamba, sithumi saye nya sagadzyana na si gu gimbilagimbila bambe nya tsongo. Na wonide gitataro vbakari nya dzitshava, a di ruma githumi guya gi dzega.

⁶ Na gi tude a di wona gyanana na gi gu lila. A di pwela wusiwana gyanana gile, a ganela, khuye: “Gyanana nya Vahebheru!”

⁷ Khavbo avbo, ndruye wa gyanana a di embela nyamahegyane wa Faro, khuye: “U ngu dzina gukhuwe eni nyi ya gu ranela nyamayi moyo nya Muhebheru a gu mamisela gyanana gegi, gani?”

⁸ Nyamahegyane wa Faro a di hakha, khuye: “Indra!” Khu guralo, gyagadzyana gi di tutuma gi ya rana mayi wa gyanana gile.

⁹ Khavbo avbo, nyamahegyane wa Faro a di embela nyamayi, khuye: “Dzega gyanana gegi u nyi dandrisela, eni nyi na gu livba.” Nyamayi a di dzega gyanana aya gi dandrisa.

¹⁰ Na gi dandride gyanana, nyamayi a di gi dzega aya gi ningela ga nyamahegyane wa Faro, a nga gi hakhago kha nga gyanana gyaye furi. Uye a di rana gyanana khuye khu Mosi, kholu a di khuye: “Nyi gi duside khu matini.”

Mosi a ngu songa Mugipiti a thavela Medhiyani

¹¹ Ga matshigu yale, Mosi nari khongolo, a di hongola ga vandriyaye, aya wona khu maho yaye gulemela nya mithumo yawe. A di wona moyo nya Mugipiti na gu bayisa moyo nya Muhebheru, a gu ndriyaye.

¹² A di khedzisa dziphuvbo dzatshavbo a wona nya gukhuye gu mwalo muthu, a di songa Mugipiti a mu futela khu mafu.

¹³ Khu mindru gakone, a di duga gambe, aholu a diya mana Vahebheru vavili na va gu dwana. Mosi a di kawuka oyu a nga bani na ghohede kwawe, khuye: “Khu ginani u vetago ndriyago?”

¹⁴ Uye a di mu phindrula, khuye: “Khu mani a nga gu vega kha nga muthangeli ni mulamuli vbakari gwathu? Wa gu vbweta gu nyi songa neni kha nga Mugipiti u nga mu songago, gani?” Khavbo avbo, Mosi a di khala hwanga, a pimisa, khuye: “Mahungu yaya khu lisine ma tidwe.”

¹⁵ Avbo Faro a nga pwago mahungu yaya, a di vbweta Mosi gasi gu mu songa; aholu uye a di thava aya khala tigoni ga Medhiyani. Na vbohide iyoyo, a diya khala vbafuvbi ni nambo.

¹⁶ Muphasi nya mhamba wa Medhiyani a diri ni livbandre na vavili vanyamahegyane, va ngata rega mati va tadza sighowolo gasi gu sedza tshambi wa babe wawe.

¹⁷ Gu dita vahavisi va ta si tutumisa; khavbo avbo, Mosi a di khuga a si emela, a gu sedza tshambi.

¹⁸ Gikhati vanyamahegyane va nga bwelelago avbo a nga bani a romo babe wawe Reweli, uye a di va wudzisa, khuye: “Mu di dzi kodza kharini muhuno mu vbiredzelago gu wuya?”

¹⁹ Avo va di hakha, khavo: “Mwama moyo nya Mugipiti a di hi emela ga vahavisi, a hi regela mati a bwelo khavbo a sedza mitshambi yathu.”

²⁰ Reweli a di va wudzisa, khuye: “Womo hayi uye? Khu ginani mu ngamba mu resani avba mwama yoyo? Indrani mu ya mu rana gasi hita hodza naye.”

²¹ Mosi a di dzumela gu khala ni mwama wule; uye a di ninga Mosi nyamahegyane waye nya gupwani khu Zipora, gu khala mwangadzi waye.

²² Zipora a di velega gyanana nya gikhwathana egi Mosi a nga gi riya lina la Gerisoni, a ganela, khuye: “Nyi muwuyi tigoni momu nya valombo.”

Gufa ga mufumeli wa Egipito

²³ Hwane nya myaga nya gutale, a difa mufumeli wa Egipito, vathu va na Israyeli, va di tshaniseka wugumbini. Va di lila, dzihuwa nya gutshaniseke gwawe, dzi di gwela kala ga Nungungulu.

²⁴ Nungungulu a dipwa gulila gwawe, a dundruga gidzumeledzwano a giridego ni Abrahama, Isaki ni Jakobe.

²⁵ Nungungulu a di khedza sanana sa Israyeli, a wona gutshaniseka gwawe.