Ekisodha 1 - Bhibhiliya Nya Guage

I. WUGUMBI NI GUTSHULEGA Situgulwana sa Jakobe tigoni ga Egipito

¹ Aya khu malina ya sanana sa Israyeli si nga hongolago ni Jakobe tigoni ga Egipito, moyo ni moyo ni ndranga yaye.

² Rubheni, Simiyoni, Levhi ni Judha,

³ Isakari, Zebhuloni ni Bhejami,

⁴ Dhani, Nafitali, Gadhi ni Aseri.

⁵ Situgulwana satshavbo sa Jakobe ni dzingamo dzawe si diri livbandre na mavili magumi; vbavbandze basi ga Josefe a nga bani nari khu gale tigoni ga Egipito.

⁶ A difa Josefe, va gufa navo vandriyaye ni melana wawe watshavbo,

⁷ aholu sanana sa Israyeli si diya na si gu engedzela gu velegelana khu tshivba. Si di pandregelana si andra kala va tadza litigo latshavbo la Egipito.

Vagipiti va ngu gira dzikhumbi Vahebheru

⁸ Khu hwane, litigo la Egipito li di fumedwa khu mufumeli nya muphya, a ngamba ti gilo khu mahungu ya Josefa.

⁹ Uye a di embela vathu vaye, khuye: “Wonani nya gukhenu sanana sa Israyeli si tade si khala lihundzu nya likhongolo nya tshivba guvbindra ethu.

¹⁰ Gu vbweta hi dzi wonela gwawe, gasi va si simami va velegelana, gasi ya gu dugelela nyimbi, va si emi ni valala vathu va hi wugela va kodza gu duga tigoni momu.”

¹¹ Va di rumela dzighadhi gasi gu khevisela sanana sa Israyeli va si lemedza khu mithumo nya gulemele. Khu guralo, va na Israyeli va di vbahela Faro, madhoropa ya Pitomi ni Ramisesi, umo mufumeli wa Egipito a nga bani na gu vegedzela umo dzithomba nya dzimbewu dza mahangeni.

¹² Aholu, avbo va nga bani va gu tshaniswa khu tshivba, avo va di dandra va velegelana ngudzu va andra; khu kharato, Vagipiti va di thedwa hwanga khu va na Israyeli.

¹³ Khavbo avbo, Vagipiti va di tshanisa va na Israyeli va va gira dzikhumbi.

¹⁴ Va di va tshanisa khu mithumo nya gulemele ngudzu nya gubagelele libumba ni gu gira sitini, ni mithumo yatshavbo nya wulimi ni wugumbi watshavbo va nga va rwegago khu tshivba.

Vasingalagadzi va ngu vbulugisa sanana nya Vahebheru

¹⁵ Aholu, mufumeli wa Egipito a di ranisa Sifraha ni Puwa; vasingalagadzi va nga bani va dzegelela vanyamayi nya Vahebheru, a va ninga nayo, khuye:

¹⁶ “Avbo mu dzegelelago vanyamayi nya Vahebheru, khedzisani gwadi gyanana: Va gu hefemula gyanana nya gikhwathana, songani; a gu bani nari gyagadyana gi digeni gi vbanya.”

¹⁷ Aholu vasingalagadzi va di gu thava Nungungulu, kha va nga gira esi va nga rumwago khu mufumeli wa Egipito, va di diga sanana nya sikhwathana si vbanya.

¹⁸ Khavbo avbo, mufumeli wa Egipito a di ranisa vasingalagadzi a va wudzisa, khuye: “Khu ginani mu girago kharati, mu diga sanana nya sikhwathana si vbanya?”

¹⁹ Vasingalagadzi va di hakha, khavo: “Gu girega esi kota nya gu vanyamayi nya Vahebheru, va ngu hambana ni Vagipiti. Va na ni tshivba, va gudzegela guhefemula na si gu vbohi singalagadzi.”

²⁰ Nungungulu a di kategisa vasingalagadzi, khu magirelo yoyo, vathu va na Israyeli va di engedzelana gutala, va mana tshivba nya yikhongolo;

²¹ Nungungulu a di kategisa mapango ya vasingalagadzi, kholu va nga yeyedza githawo gwaye.

²² Khavbo avbo, Faro a di vega nayo yoyu ga vathu vaye vatshavbo, khuye: “Dzamisani tsongoni wa Nilo sanana satshavbo nya sikhwathana si velegwago khu Vahebheru. Aholu esi nya sagadzyana si digeni satshavbo si vbanya.”