Dzindzimo 97 - Bhibhiliya Nya Guage

Pfhumu Nungungulu mufumeli nya khongolo

¹ Pfhumu Nungungulu a ngu fuma. Li na kulungele litigo, gu na nengele talo nya sidwa.

² Randredwe khu mapfhi ni gidema, litshina nya wufumu Waye khu gululama ni lisine.

³ Nilo wa gu thanga mbeli gwaye, wu vbisa valala va mu randredego.

⁴ Gulasa gwaye gwa gu wenengedza mafuni; litigo li gu wona li ndrendremela.

⁵ Sigomo sa gu nyega mbeli Gwaye kha nga mafura, mbeli ga Pfhumu Nungungulu a gu mune nya litigo latshavbo.

⁶ Ndzadzini gwa gu tivisa gululama gwaye, ni mafuni va wona wudhumo waye.

⁷ Va na thedwe dzitshoni avo va khozelago sifananiso nya guvatwe, avo va dzi khusedzago khu gu khozela sifananiso, va na khidzime mbeli gwaye vanungungulu vatshavbo.

⁸ Siyoni a na sipwe a nengela, sagadzyana sa Judha si na khulungele, khu kotani nya gulamule gwago, uwe Pfhumu Nungungulu.

⁹ Kholu uwe Pfhumu Nungungulu u Khusegide ngudzu vbakari nya litigo latshavbo, Uwe u Khusegide vatshani ga vanungungulu vatshavbo.

¹⁰ Enu mu golago Pfhumu Nungungulu, nyenyani guvivba, uye a ngu sayisa mihefemulo ya vale va mu khozelago, a va vbulugisa mandzani ya va nya guvivba.

¹¹ Wenengedzo wu na wonege ga va nya gululama, ni gutsaka gu manega ga vathu nya myonyo nya gululame.

¹² Nengelani ga Pfhumu Nungungulu enu va nya gululama, mu dhumisa lina laye nya gukatege!