Dzindzimo 86 - Bhibhiliya Nya Guage

Nombelo nya gulombe guphaswa khu Nungungulu

Nombelo wa Dhavhidhe

¹ Uwe Pfhumu Nungungulu, neredza ndzeve u nyi yingisa u nyi ninga phindrulo, kholu nyi musaniseki ni muhamugi.

² Vhikela womi wangu, kholu eni nyi mukhodwa wago nya gutumbege; uwe khuwe Nungungulu wangu, vbanyisa githumi gyago gi gu tumbago.

³ Nyi pwele wuhindzi Pfhumu, kholu gikhati gyatshavbo nyi ngu lila mbeli gwago.

⁴ Pfhumu tsakisa hefemulo wa githumi gyago, kholu nombelo wangu nyi ngu wu khusedzela iyo gwago.

⁵ Kholu uwe Pfhumu, u wadi u ngu tsetselela; u ngu hakha khu mandza mavili vatshavbo va gu khozelago.

⁶ Yingisa Pfhumu Nungungulu, nombelo wangu yingisa lito nya milombelo yangu.

⁷ Musigaradzoni, nya gu lila avbo gwago, kholu uwe u ngu nyi hakha.

⁸ Vbakari nya vanungungulu vatshavbo mwalo a fananago ni uwe, Pfhumu; mwalo a kodzago gu gira mithumo uwe u yi girago.

⁹ Mifumo yatshavbo u yi giridego yi nata khidzima mbeli gwago uwe Pfhumu, yi na dhumisa lina lago.

¹⁰ Kholu khuwe basi u gu Nungungulu, u gu khongolo, u girago siliwugiso!

¹¹ Nyi hevbudze Pfhumu ndzila yago, gasi nyi kodza gu gimbila lisineni.

¹² Nyi na gu bonga Pfhumu Nungungulu wangu, khu monyo wangu watshavbo, nyi na dhumisa lina lago kala gupindruga,

¹³ kholu wuhindzi wago wungi avbo gwangu, u vbanyiside womi wangu phalani nya lufu.

¹⁴ Oh, Nungungulu, nyi ngu wugedwa khu va nya matshandza, tsawa nya sighevenga va ngu vbweta gu nyi songa; avo kha va khathali khu uwe.

¹⁵ Aholu uwe Pfhumu, u Nungungulu u pwelago gisiro u tade khu wuhindzi, u ngu timisela, u tade khu wuhindzi ni lisine.

¹⁶ Thendregedza eno gwangu, u nyi pwela wusiwana; ninga tshivba yago githumi gyago vbanyisa gyanana gya githumi gyago nya nyamayi.

¹⁷ Nyi ninge giyeyedzo nya wuwadi wago, gasi va gi wone avo va nyi vengago va khale dzitshoni, kholu uwe Pfhumu Nungungulu u ngu nyi phasa ni gu nyi tangadzisa.