Dzindzimo 83 - Bhibhiliya Nya Guage

Nombelo nya gulombe guphaswa khu Nungungulu

Ndzimo ya Asafi

¹ Uwe Nungungulu, u nga deguli, U nga tshiki dzindzeve, u khumbarana mawogo u khedzisela!

² Wona, valala vago, va ngu gira pfilupfilu, ni avo va gu vengago va ngu dzi khusa va Gu wugela.

³ Va gu luga mano nya guwugele vathu vago, va hunga gikungo nya gusonge avo U va sayisago!

⁴ Vari, khavo: “Deluni, hongoleni hi fuvise vathu va na Israyeli, gasi lina lawe li futwa muphelo li si alakanywi gambe.”

⁵ Kholu va pwananide khu monyo moyo va vbweta gu Gu wugela, va hungide gikungo nya gudwane Nago.

⁶ Avo va girago esi khu Vaedhomi ni Vaismayeli, khu situgulwana sa Mowabhi ni sa Agari,

⁷ khu Vagebhali, Vaamoni ni Vaamaleki, Vafilisitiya gumogo ni vavbanyi va Tiro;

⁸ ni Vaasiriya navo va dzi patide avbo, khavo va ningago tshivba sanana sa Loti.

⁹ Va gire kha nga idzo u nga girago Vamedhiyani, kha nga idzo u nga girago Vasisera gumogo ni Vajabhimi gitsongwanani gya Kisomi;

¹⁰ U nga va mbembisa dhoropani ga Eni-Dhori; sirumbi sawe si hinidego mafuni.

¹¹ Gira vafumeli vawe kha nga idzo u nga girago Orebhi ni Zehebhi; gira vathangeli vawe vatshavbo kha nga idzo u giridego Zebha ni Zalimuna,

¹² va nga sambanyago, khavo: Hi na wandre litigo la Nungungulu li khale lathu.

¹³ Nungungulu wangu, va phalalegise kha nga mungu, kha nga marego nya gubange ma vbuvbiswago khu phuvbo.

¹⁴ Va fuvise gukhwatshi khu nilo wu vbisago likhabi, gukhwatshi misimbo ya sigomoni yi tsagamago khu luvbya.

¹⁵ Va tutumise kharato khu phuvbo yago, u va thela hwanga khu gingulu gyago!

¹⁶ Va thele dzitshoni nya dzikhongolo Pfhumu Nungungulu, gasi va fela gu wuya gwago.

¹⁷ Va na padwe va thedwa dzitshoni kala gupindruga; va na vbele tshivba vafa khu dzitshoni dzawe!

¹⁸ Va na dziti gukhavo khuwe basi u gu Pfhumu Nungungulu, khuwe basi u Khusegidego ngudzu vbatshani nya litigo latshavbo!