Dzindzimo 82 - Bhibhiliya Nya Guage

Nungungulu mulamuli wa vathu vatshavbo

Ndzimo ya Asafi

¹ Nungungulu khade wulanga waye wa vbatshani; a lamula vbakari nya huwo nya vanungungulu.

² “Kala lini mu na hegisago gu lamula nyamba lulama? Kala lini mu na gu emela va nya guvivba?

³ Emelani dzifanelo nya sisiwana ni sigulungu phasedzelani avo va sanisekago ni avo va gu mwalo muthu nya gu va emele.

⁴ Vbanyisani avo va saniswago ni sisiwana, va vbulugiseni mandzani ga va nya guvivba.”

⁵ Sipumbu kha siti gilo, sa gu vbanya gidemani; giseketelo nya nayo ni gululama tigoni, gi ngu tsekatsekiswa.

⁶ Eni nyi di, kheni: “Enu mu vanungungulu, enu mwatshavbo mu sanana sa Uye a Khusegidego ngudzu.

⁷ Ambari ulo enu mwatshavbo mu nafa nenu kha nga vathu vatshavbo, mu na vbelani tshivba kha nga mwama nya dzihanyi.”

⁸ Uwe Nungungulu, khuga u lamula litigo, kholu mayigo yatshavbo ma gu lumba Uwe.