Dzindzimo 79 - Bhibhiliya Nya Guage

Va na Israyeli va ngu lomba guphaswa khu Nungungulu

Ndzimo ya Asafi

¹ Uwe Nungungulu, tigoni gwago gu bede va nya mayigo va nyenyezisa nyumba yago nya guage, lidhoropa la Jerusalema va li giride marumbi.

² Va digide sirumbi sa vathu vago si hodzwa khu sinyoni sa damboni ni sirumbi sa sihathwa sago si hodzwa khu sirengo sa khabini.

³ Novba wa vathu vago va wu vbaladzide kha nga mati malangani gwatshavbo ga Jerusalema, mwalo a nga tshalago gasi gu va dzinga.

⁴ Hi khade gihegiso ga vaakelane vathu, vale va nga hi randrela va hi hega ni gu hi tsorodzela.

⁵ Pfhumu Nungungulu, likhulo lago li na simama kala lini? Ina likhulo lago li na simama li khondra kha nga nilo, gani?

⁶ Wugela mayigo ma si khodwigo gwago, ni mifumo yi si khozeligo lina lago.

⁷ Kholu khavo va nga saselago vathu va Jakobe va fuvisa dzindranga dzawe.

⁸ U nga hi tsayisi khu kotani nya sighoho sa vababe vathu; vbiredza u ta hi pwela wusiwana kholu hi vbede tshivba.

⁹ Hi phase Nungungulu muvbanyisi wathu, khu wudhumo nya lina lago, hi tshudzise u hi tsetselela siwono sathu, khu lihaladzo nya lina lago.

¹⁰ Kholu mayigo ma na wudzisa, khayo: Womo hayi Nungungulu wawe? Yeyedza vathu vovo hi wona gu phodzela nya novba wa vathu vago va nga wu vbaladza.

¹¹ Yi na vbohe iyo gwago huwa nya sibotshwa; va vbanye khu tshivba nya wugulu wago vale va konedwego gufa.

¹² Pfhumu, tsayisa vaakelane vathu khu guwuyelela guvbindra livbandre na guvili, khu kotani nya sighoho va gu giredego.

¹³ Gasi ethu hi gu vathu vago, dzinvuta nya tshambi wago ethu ni livelego lathu hi na gu dhumisa, hi embelela hi gu bonga kala gupindruga.