Dzindzimo 78 - Bhibhiliya Nya Guage

Nungungulu ni vathu vaye

Ndzimo nya sileletelo sa Asafi

¹ Vathu vangu, yingisani sihevbudzo sangu, dembani ndzeve gasi mupwa esi nyi mi embelago.

² Nya gu vbweta gu mi hevbudza khu sipimaniso, nyi mi tivisani misihalo ya gale.

³ Mahungu hi ma pwidego ni gu ma hevbula, ayo hi nga embeledzedwa khu vababe vathu,

⁴ ethu kha hi na ma sihela sanana sathu; hi na ma embeledzela ga mimelana yi nga gutago, wudhumo wa Pfhumu Nungungulu ni tshivba yaye, ni siliwugiso a si giridego.

⁵ Uye vegide nayo ga Israyeli, a ninga sileletelo sanana sa Jakobe a ruma vababe vathu gu hevbudza milayo yeyi ga sanana sathu,

⁶ gasi situgulwana sawe niso si yiti, ni sanana si nga na gu velegwa si hevbudza niso sanana sawe;

⁷ gasi va kodze gu vega gitumbo gyawe ga Nungungulu, va si divaledwi khu mithumo a giridego, va sayisa milayo yaye gikhati gyatshavbo;

⁸ va si giri kha nga vababe vawe, vathu nya guyeyise ni gumba yingela, vathu nya gubange mihungo, nyamba tiya gutumbani gwawe ga Nungungulu wawe.

⁹ Sanana nya lihundzu la Efrayimi, avo va somidego wulaho ni matshari, va diya thava va tutuma litshigu nya nyimbi.

¹⁰ Kha va landrisa gidzumeledzwano gya Nungungulu, va di bomba gu landrisa milayo yaye.

¹¹ Va di divaledwa khu mithumo yaye ni sisamadziso a va yeyedzidego.

¹² Giride siliwugiso na gu wonwa khu vababe vawe, panini ga Zowani, tigoni ga Egipito.

¹³ A di kabanisa yiphwa, a va vbindrisa khu vbakari, a gira mati ma khuga, ma khala libhiyo.

¹⁴ Gikhati nya mihani a di va gimbidzisa khu lipfhi; wutshiguwule a di va gimbidzisa khu nilo.

¹⁵ A di pandra siwindri mugiwulani, gu goga mati a va sedza khu mati nya gudugele guetani.

¹⁶ A di pola sifefe umo nya siwindri, gu goga mati kha nga mitsongo.

¹⁷ Aholu avo va di simama gu mu ghohela, va di wugela Uye a Khusegidego ngudzu mugiwulani.

¹⁸ Va di linga Nungungulu khagwenye, va mu lomba guhodza nya gugodwe khavo.

¹⁹ Va di mu wugela va ganela, khavo: “Ina Nungungulu a na dzi kodza gu hi ninga guhodza giwulani momu, gani?

²⁰ Lisine, Nungungulu pandride siwindri, gu goga mati nya mangi kha nga tsongo, aholu, a na dzi kodza gambe gu hi ninga guhodza, ni gu ninga nyama vathu vaye, gani?”

²¹ Na pwide esi, Pfhumu Nungungulu a di goroga, a tsayisa Jakobe khu nilo, likhulo laye li di engedzelana ga va na Israyeli.

²² Kholu kha va khodwa gwaye, kha va khodwa ga Nungungulu, gambe kha va tumba gu vbanyiswa khuye.

²³ Aholu Nungungulu a di ganela khu vbatshani mapfhini, a ruma gutula malimba ya ndzadzini.

²⁴ A di ninga vathu vaye guhodza ga ndzadzini, a tshisa mana gasi va hodze,

²⁵ khu kharato, vatshavbo va di hodza guhodza nya dzingilozi; a va resela guhodza nya gungi.

²⁶ A furugedza khu ndzadzini phuvbo ya Khugadambo khu tshivba yaye a di resa phuvbo nya siga.

²⁷ A di tshisela vathu vaye khu ndzadzini nyama nya gutale kha nga kudzudzwane, sinyoni nya gutale kha nga fungo wa phwani,

²⁸ si di thegela vbakari nya lizumbo lawe, bambe nya mitshatsha yawe.

²⁹ Khavbo avbo, va di hodza va khura; kholu a di va girela gugola gwawe.

³⁰ Aholu avo na va si gu kodwi, guhodza gu ngari kanani gwawe,

³¹ Nungungulu a di goroga khavo, a songa vama nya mitiyedwa ni tshivba, a thesa madzaha nya dzindrena dza Israyeli.

³² Ambari va nga wona esi, va di simama gughoha va si khodwi khu siliwugiso saye.

³³ Khu guralo, uye a di vbungula matshigu yawe ma vbindra kha nga furugedzo nya phuvbo guvbanyani gwawe va taledwa khu sigaradzo.

³⁴ Gikhati a nga bani a va tsayisa, khavbo va nga bani va gu mu alakanya.

³⁵ Khavbo va nga bani va alakanya gukhavo Nungungulu Muvhikeli wawe, ni gukhavo uye a guromo vbatshani ngudzu, khuye mudzegisi wawe.

³⁶ Aholu magana yawe ma di si tumbegi, satshavbo va nga bani va ganela a diri sa malipha.

³⁷ Kholu myonyo yawe yi di si namareli gwaye, ambari gutumbega ga gidzumeledzwano gyaye.

³⁸ Aholu Nungungulu khu wuhindzi waye, a di va tsetselela sighoho sawe a si va mbembisi, gikhati nya gingi thindrekiside likhulo laye, a si va gorogeli khu giviti.

³⁹ A di alakanya gukhuye vathu va wumbidwego khu nyama, a va gira kha nga phuvbo yi vbindrago nyamba wuya gambe.

⁴⁰ Dzinyondro dzingani va nga wugelago Nungungulu mugiwulani va mu pwisa wuvi tigoni mule nya gihala!

⁴¹ Gikhati nya gingi khegi va nga linga Nungungulu, va gorogisa oyu a Agidego wa Israyeli.

⁴² Va di si alakanyi tshivba yaye nya yikhongolo ambari gu alakanya litshigu a nga va tshudzisago ga valala vawe;

⁴³ va divaledwa khu sigiro a giridego tigoni ga Egipito ni siliwugiso, a giridego panini ga Zowa;

⁴⁴ avbo a nga vbindrugedza mati nya mitsongo yawe ma khala novba, gasi Vagipiti va si ma seli.

⁴⁵ A di rumela mabhawa ma va hodza, ni vanyakhele gasi va va sanisa.

⁴⁶ A di rumela gambe siwungu si hodza dzimbewu dzawe ni mbasa yi hodza mihandro nya thumo wawe.

⁴⁷ Songide misimbo nya mikandzu khu ndzadzi nya maralala, ni miguhu yawe khu girame.

⁴⁸ Dzimombe ni dzinvuta dzawe dzi difa nidzo, khu kotani nya ndzadzi nya maralala ni mabara.

⁴⁹ A dita na gorogide ngudzu, ata va bayisa khu likhulo laye nya likhongolo, a va wusela dzimhango dzatshavbo nya gusonge khu lidhuma nya dzingilozi.

⁵⁰ Uye gima kha vbungula likhulo laye, gambe kha va diga va vbanya, aholu, a di va songa khu tungu.

⁵¹ Ga ndranga ni ndranga ya tigoni ga Egipito, a di songa gyanana nya matiwula, handro nya guphele nya tshivba yawe mitshatshani ya Kami.

⁵² Uye a di dusa vathu vaye kha nga dzinvuta, kha nga muhavisi a ghulago tshambi waye, khu vbakari nya giwula.

⁵³ A di va thangela na tiyide, avo va di si khali hwanga, aholu valala vawe va di fenengedzwa khu mati nya yiphwa.

⁵⁴ A di dzega vathu vaye a va yisa tigoni nya gukatege, gigomoni a nga gi hatha khu libogo laye la nyamudye.

⁵⁵ A di tutumisa vavbanyi va mayigoni mule na va gu si wona, mayigo yawe a ma kabanisela mahundzu ya Israyeli.

⁵⁶ Ambari ulo, va na Israyeli va di tiya gu wugela Pfhumu Nungungulu, va mu linga, va si yingeli milayo yaye.

⁵⁷ Kha va tumbega, va di mu wugela, kha nga vababe vawe, va di penga kha nga giholoma, nya gukhwandrwe khu wulaho nya guwegele.

⁵⁸ Va di mu gorosa khu gu gira siluvelo nya wuhedheni, va mu girisa wufu khu kotani nya gukhozele vanungungulu nya malipha.

⁵⁹ Nungungulu, na wone esi, a di goroga, a pfhurarela muphelo va na Israyeli.

⁶⁰ Kala a diga ni Tshatsha waye nya miphaso tigoni ga Silo, nyumba a nga bani a gu vbanyela umo vbakari nya vathu.

⁶¹ A di diga valala va dzega ngasa nya gidzumeledzwano, a nga bani ari giwonegiso nya tshivba ni wudhumo waye.

⁶² A di girela likhulo vathu vaye, a va diga va songwa khu valala vawe.

⁶³ Madzaha ma di dagarela khu nilo, vanyamahegyane va hamuga vama nya gudzegwe khavo.

⁶⁴ Vaphasi nya mhamba va di songwa khu matshari; dzinoni dza vaphasi dzi di himbedzedwa gu lila vama vawe.

⁶⁵ Khavbo, Pfhumu, a nga gira gukhwatshi gu khendzuga khu ligovbeni, kha nga mwama nya ndrena a wusedwago wunyanyu waye khu wadwa.

⁶⁶ A di khozisa valala vaye va bwelela hwane, va thavela muphelo khu dzitshoni ni gu padwa.

⁶⁷ Khu guralo, a di nyenya situgulwana sa Josefe, kha hatha lihundzu la Efrayimi.

⁶⁸ Aholu a di hatha lihundzu la Judha, ni gigomo gya Siyoni a gi golago ngudzu.

⁶⁹ Uye vbahide Nyumba yaye nya Guage yi lapha kha nga ndzadzini, yi tiya kha nga mafu a ma tiyisidego kala gupindruga.

⁷⁰ A di hatha githumi gyaye Dhavhidhe, a mu dusa panini mavbandroni nya dzinvuta,

⁷¹ a nga bani a gu havisa umo dzinvuta, a di mu vega kha nga muhavisi wa Jakobe ni vathu vaye, ni muhavisi wa Israyeli thomba yaye.

⁷² Dhavhidhe a di va sayisa gwadi khu ndruda, a va fumela khu guti nya gukhongolo.