Dzindzimo 77 - Bhibhiliya Nya Guage

Nungungulu mutangadzisi wa vale va tshanisekago

Ga muthangeli nya tsawa nya vaembeleli khu maembelo ya Jedhutumi. Ndzimo ya Asafi

¹ Eni nyi ngu khusedza lito langu ga Nungungulu, nyi lila gwaye gasi uye a nyi yingise.

² Litshigu nya wuvi, nya gu vbweta Pfhumu; vbakari nya wutshigu, nya gu khusedza mandza nyi lombelela nyamba garala; aholu hefemulo wangu kha wu mani gu tangadziswa.

³ Nya gu alakanya Nungungulu, nya gu lila; nya gu pimisela nya gu vbela tshivba.

⁴ Uwe khu nyi digi nyi mana ligovbe; nyi ngu garadzega ngudzu nyamba kodza ni gu ganela.

⁵ Nya gu alakanya matshigu ma vbindridego, nya gu dundruga myaga yi vbindridego gale.

⁶ Nya gu pila wutshigu watshavbo na nyi pimisela silo nya guete, nyi phela gu hingigedzela, nyi dzi wudzisa nyabune, kheni:

⁷ Ina Pfhumu a gu vbweta gu nyi digela muphelo, gani? Guyeyedza gupwani uye kha na hi hakha gambe, gani?

⁸ Ina lihaladzo laye li vbede kamwe, gani? Ina gitumbiso gyaye gi vbelede muphelo, gani?

⁹ Nungungulu a di divaledwa khu wuwadi waye, gani? Likhulo li di dzega wulanga nya wuhindzi waye, gani?

¹⁰ Egi gi nyi vbisago ngudzu khu gu pimisa gukheni: “Nungungulu a Khusegidego ngudzu kha dzini gu hi phasa gambe.”

¹¹ Pfhumu Nungungulu, eni nyi na dundruga sigiro sago nya gusamadzise, nyi na alakanya siliwugiso u giridego gale.

¹² Nyi na alakanya gambe mithumo yatshavbo u giridego, nyi alakanyela sigiro sago nya gusamadzise.

¹³ Ndzila yago uwe Nungungulu, yi agide. Mwalo nungungulu a gu khongolo guvbindra Nungungulu wathu.

¹⁴ Uwe u Nungungulu u girago siliwugiso, u wonegiside tshivba yago ga mayigo yatshavbo.

¹⁵ Khu tshivba nya libogo lago u vbanyiside vathu vago, situgulwana sa Jakobe ni Josefe.

¹⁶ Avbo mati ma nga wona uwe Nungungulu, mati ma di gu wona ma thava, ni milondrwa yi di ndrendremela.

¹⁷ Mapfhi ma di wisa ndzadzi, gudzuma mabara damboni; dzinyangafula dzi di duga khu maphuvbo yatshavbo.

¹⁸ Gudzuma nya mabara yago gu di pwala malangani gwatshavbo; gulasa gu di wenengedza litigo latshavbo, litigo li di kutsungwa li ndrendremela.

¹⁹ Uwe u di pola ndzila vbakari nya mati, u tsemakanya nondrwa nya wukhongolo, aholu mwalo a wonidego ngondro wago.

²⁰ U di gimbidzisa vathu vago kha nga muhavisi, khu mandza ya Mosi ni Aroni.