Dzindzimo 73 - Bhibhiliya Nya Guage

LIBHUKU NYA WURARU Tshatshazelo nya esi nya sadi nesi nya guvivbe.

Ndzimo ya Asafi

¹ Khu lisine, Nungungulu khwadi ga vathu va Israyeli, ga vale va agidego myonyo.

² Gasi eni, migondro yangu yi di hadza gu kwiriga; vbadugwana nyi di vbweta gu ndreya nyi thega.

³ Kholu eni nyi di gu girela lidiwo va nya gu dzi khusedza, khu gu wona gukheni silo sawe sa gu duga gwadi.

⁴ Va nya guvivba va mwalo sigaradzo va gu ena va vbanya gwadi.

⁵ Guvbanyani gwawe va mwalo sigaradzo, Kha va saniseki kha nga vambe vathu.

⁶ Va gu ambala matshandza kha nga karara, va fenengela dzihanyi kha nga libhadzi.

⁷ Maho yawe ma simbide khu mafura; myonyoni gwawe gu tade khu maalakanyo nya guvivbe.

⁸ Va gu gola gu poyila ni gu ganelela sihonohono; va gu dzi gugumugisa va gira gikungo nya gutshanise.

⁹ Va gu khusedza magana va vala Nungungulu wa ndzadzini, lidimi lawe la gu nava li vala va mafuni gwatshavbo.

¹⁰ Khu guralo, vathu vawe va gu va zundza va va yingisa gwadi va si woni gwawe guvivba.

¹¹ Va ganela, khavo: “Nungungulu kha na nga siti!” Ina uye a Khusegidego ngudzu a na si wona, gani?

¹² Khidzo kharato ga nya guvivba; va khadzisegide, va gu wungedzela dzithomba.

¹³ Khu guralo, kha ga phasa gilo gu agisa monyo wangu, gu vbweta guvbanya gwadi ni gu dzi agisa nyi si giri gighoho.

¹⁴ Kholu nya gu simama gutshaniseka gikhati gyatshavbo gugya ni gugya nya gu tsayiswa.

¹⁵ Nari pwani nyi di landrisela maganelelo yawe, na nyi khulugiside vathu vago.

¹⁶ Nyi zamide gu vbweta gu pima silo sesi, aholu si di nyi garadzela ngudzu;

¹⁷ kala nyiya bela wulangani nya guage wa Nungungulu khavbo nyi ngaya pima mahegiselo ya va nya guvivba.

¹⁸ Khu lisine u va vegide wulangani nya gukwirige u va rindrividzela gumbembani.

¹⁹ Va na thedwa hwanga va mbembiswa khu githugedza, va vbiyedwa va fuviswa.

²⁰ Kha nga ndroro a lorago muthu a gu wuga a yi divalago, uwe nuwe Pfhumu wa gu wuga va divale ni giyemo gyawe.

²¹ Avbo monyo wangu wu nga vbisega wu khunguvanyega hefemulo wangu,

²² nyi di khala gipumbu nyambati gilo, kholu nyi di vbindrugedzide nyi khala girengo nyambana mapimo.

²³ Ambari khu guralo, eni nyi womo gumogo nago u nyi pharide khu libogo langu la nyamudye.

²⁴ Khuwe u nyi gimbidzisago khu nayo wago Khu guhegisa u na nyi hakha gambe khu wuzundzo.

²⁵ Khu mani mumbe nyi gu naye eni ndzadzini, vbavbandze gwago? Mafuni momu, nya gu gola gu khala nago basi.

²⁶ Ambari mili ni hefemulo wangu sa gu vbela tshivba, Nungungulu likhokhola nya monyo wangu khuye thomba yangu nyamba vbela.

²⁷ Avo va dzi pambulago gwago, va nafa; uwe u ngu fuvisa vatshavbo avo va si khodwigo gwago.

²⁸ Gasi eni nya gu gola gu khala vbafuvbi ni Nungungulu; uwe Pfhumu Nungungulu khuwe wuthavelo wangu, nyi na huwelela sigiro sago satshavbo.