Dzindzimo 7 - Bhibhiliya Nya Guage

Nombelo nya gulombe gu lamudwa

Ndzimo a nga emba Dhavhidhe ga Pfhumu Nungungulu khu kotani ya Khusi wa na Bhejami

¹ Pfhumu Nungungulu wangu, eni nyi ngu thavela avbo gwago! Nyi vbulugise ga valala vangu vatshavbo! Nyi vbanyise!

² Va nga nyi songa kha nga nghala, va nyi vbadzulela nyambana wangu nya gu nyi phase!

³ Pfhumu Nungungulu wangu, nya gu bani nyi giride nandru ga iso va nyi rwegago, nya gu bani nyi nyenyeziside mandza yangu khu mithumo nya guvivbe;

⁴ nya gu bani nyi bweledzede khu guvivba oyu a nga nyi phasa, nya gu bani nyi digide gu tsayisa oyu a nga nyi hosela,

⁵ nala wangu a na nyi lundre kala a nyi mola! A na nyi these vbavbatshi a nyi gandredzela nyi nga gu vbanya, a rinya womi wangu omu nya kudzudzwane!

⁶ Pfhumu Nungungulu, khuga u ema nu gorogide! Wuga nu tade khu likhulo, u dwana ni valala vangu; delu u ta nyi emela, gukhedza khu gulamula u gu vegisedego.

⁷ Tombanisa mayigo ma ta gu randrela; u tshiga khu vbatshani u ta khala mbeli gwawe.

⁸ Pfhumu Nungungulu a na lamula mayigo; nyi lamule Pfhumu Nungungulu, gukhedza khu fanelo yangu, kholu eni nyi muthu nya gululame, nyi mwalo nandru.

⁹ Vbedza guvivba nya sighohi, u tiyisa muthu nya gululame Uwe Nungungulu nya gululame u wonago monyo ni mahingigedzo.

¹⁰ Nungungulu khuye gitshangu gyangu; a ngu vbanyisa va nya myonyo nya gululame.

¹¹ Nungungulu mulamuli nya lisine, gikhati gyatshavbo a gu kona sighohi.

¹² Muthu nya guvivbedwe khu monyo a gumba vbindrugedza mavbanyelo, Nungungulu a na lodza litshari laye, a ghwimba wulaho a seketela gasi gu rinya sighalala.

¹³ A mu dongisede matshari nya gusonge a seketela sighalala saye nya nilo.

¹⁴ Wonani muthu nya guvivbe, a gu vbaha guvivba a khura mimba nya manyala, a velega malipha.

¹⁵ Uye a di kemba liphala nya guete ngudzu, aholu a thegela seleni a nga wu kembago abune.

¹⁶ Guvivba gwaye gu na thegela hungoni gwaye, a na pfarwa hungo khu wughevenga waye.

¹⁷ Nyi na bonga Pfhumu Nungungulu khu gululama gwaye, nyi na embelela nyi rungudza lina la Pfhumu Nungungulu a guromo vbatshani ngudzu.