Dzindzimo 65 - Bhibhiliya Nya Guage

Nungungulu fanede gu dhumiswa

Ga muthangeli nya tsawa nya vaembeleli. Ndzimo ya Dhavhidhe

¹ Uwe Nungungulu u fanede gu dhumiswa Siyoni! Esi vathu va sambanyidego, va fanede gu gu ninga.

² Uwe u yingisago milombelo, vathu vatshavbo va nata avbo gwago.

³ Mithumo yathu nya guvivbe yi ngu hi lemela guvbindra pimo, aholu uwe u ngu hi tsetselela siwono sathu.

⁴ Kategide muthu u mu hathago a hidzimela vbafuvbi gwago, gasi guta vbanya nyumbani gwago, ethu nethu hi ngu nengela khu esi nya sadi sa Nyumbani gwago nya guage.

⁵ Nungungulu muvbanyisi wathu, Uwe u ngu hi hakha ni gu hi vbanyisa khu gu gira silo nya gusamadzise; litigo latshavbo la gutumba uwe, ni avo va guromo linene ga hwindzo.

⁶ Uwe u ngu tiyisa sigomo, khu wugulu nya tshivba yago.

⁷ Uwe u ngu degudza ligwaha nya linene, ni mavimbi yaye, u vbedza ligwaha la vathu va tigoni.

⁸ Ni ava va vbanyago mayigoni ya mahegiso nya mafu, va ngu samala siliwugiso nya mithumo yago; gukhugela Khugadambo kala Muhwadambo, gu pwala mikulungwane nya gutsake.

⁹ U ngu khatalela litigo u li sayisa; u li rumela ndzadzi ni gu li velegisa mihandro; u ngu tadza mitsongo khu mati ni gu dandrisa sivbila, u ngu dongisela kharati wulime.

¹⁰ Wa gu naganisela gwadi mikova nya litigo, u lulamisela gwadi mafu nya wulime u wisa ndzadzi u nonisa litigo, u gu kategisa mihandro yaye.

¹¹ U tshambiside mwaga watshavbo khu makategwa yago, wulanga ni wulanga u vbindrago, vathu va gu fuma va hodza va khura.

¹² Giwula gya gu fenengedzwa khu mwasi nya gunyuge, sigomo sa gu ambala gungangamela.

¹³ Mapani ma gu tala khu mitshambi, mikova yi fenengedzwa khu sivbila; vatshavbo va gu emba va kulungela khu gunengela.