Dzindzimo 62 - Bhibhiliya Nya Guage

Nungungulu khuye basi a gu muvbanyisi

Ga muthangeli nya tsawa nya vaembeleli. Khu maembelo ya Jedhutumi. Ndzimo ya Dhavhidhe

¹ Hefemulo wangu wa gu mana gurula ga Nungungulu basi; guvbanyiswa gwangu gwa guta khiyo gwaye.

² Khuye basi a nyi vbanyisago ni gu nyi vhikela, kha nyi na padwa kholu khuye wuthavelo wangu.

³ Gasi enu mwatshavbo mu na kala lini na mu gu wugela muthu, gasi mu fela gu mu khungumula, a fanana ni ndzari yi khuyugago mwendro libhiyo li vbwetago gu thega, na?

⁴ Va gu dwanela gu nyi tshisa vbavbatshi, va nengela khu gu nyi kanganyisa, va gu rungudza khu magana basi, aholu va vala khu myonyoni gwawe.

⁵ Hefemulo wangu wa gu khevisela Nungungulu basi, kholu gutumba gwangu gwa guta khavbo gwaye.

⁶ Khuye basi a nyi vbanyisago ni gu nyi vhikela, kha nyi na padwa kholu khuye wuthavelo wangu.

⁷ Guvbanyiswa ni wudhumo wangu womo ga Nungungulu; khuye muvhikeli wangu nya tshivba, wulanga nyi thavelago avbo.

⁸ Enu vathu tumbani Nungungulu gikhati gyatshavbo; mu embeledzeleni mabala ya monyoni gwangu, kholu, uye khuye wuthavelo wathu.

⁹ Vathu vatshavbo, sisiwana ni sitetema; va gu fanana ni furugedzo; va gu pimwa mugikaloni, va gu manega vasiri gilo, va gu vbevbuga guvbindra furugedzo.

¹⁰ Mu nga tumbini tshivba, mu nga dzi gugumugisi khu gu gira guvivba; mwa gu fuma dzithomba nya gutale, mu nga vegini avbo myonyo yanu.

¹¹ Nungungulu a di ganela gumogo basi, eni nyi mupwa guvili, khuye: “Tshivba ya gu lumba uye,”

¹² Lihaladzo la gu lumba Pfhumu kholu a gu bweledzela ga muthu ni muthu gukhedza khu mithumo yaye.