Dzindzimo 6 - Bhibhiliya Nya Guage

Nombelo nya gulombe guphasedzedwa

Ga vathangeli nya vaembeleli khu gitendre. Ndzimo ya Dhavhidhe

¹ Pfhumu Nungungulu, u nga nyi kawuki nu tade khu likhulo, ambari gu nyi tsayisa nuri ni likhulo.

² Nyi pwele wusiwana Pfhumu Nungungulu, kholu nyi ngu vbela tshivba; nyi hawulugise Pfhumu Nungungulu, kholu marambo yangu ma ngu khuyugela.

³ Hefemulo wangu nuwo wu ngu tshaniseka; aholu uwe Pfhumu Nungungulu, nyi na lirela kala lini?

⁴ Wuya Pfhumu Nungungulu, u ta vbanyisa hefemulo wangu; nyi vbanyise khu wuhigo wago.

⁵ Kholu avo vafudego, kha va gu alakanyi, khu mani a gu rungudzago nari thowoni?

⁶ Nyi vbede tshivba khu gu lila, marongo yangu ma gu goga wutshigu watshavbo nyi naganisa lidawu langu ni gikhuledzo.

⁷ Maho yangu ma gu simba khu gulila ma rereka khu kotani ya valala vangu va tadego.

⁸ Ndreyani mbeli gwangu, mwatshavbo mu girago guvivba kholu Pfhumu Nungungulu pwide huwa nya gulile gwangu.

⁹ Pfhumu Nungungulu pwide gu lomba gwangu, Pfhumu Nungungulu hakhide nombelo wangu.

¹⁰ Va na khale dzitshoni, va ndrendremela valala vangu vatshavbo, va na phalalege khu guvbiredza na va tade khu dzitshoni!