Dzindzimo 59 - Bhibhiliya Nya Guage

Nombelo nya gulombe gu tshudziswa

Ga muthangeli nya tsawa nya vaembeleli. Khu maembelo nya ndzimo yi gu, khiyo: “U nga pfhungumuli.” Ndzimo ya Dhavhidhe gikhati Sawule a nga ruma vathu gu ya randrela nyumba yaye gasi va mu songa

¹ Uwe Nungungulu wangu, nyi vbulugise ga valala vangu; nyi vbanyise ga ava va nyi tshanisago.

² Nyi emele ga ava va girago esi nya guvivbe, nyi vbulugise ga sighevenga.

³ Nungungulu wangu, wona avo va nyi dembelago mazinga, va wugela hefemulo wangu; va nya dzitshivba va gu nyi wugela, nya sa ghoha gilo.

⁴ Ambari nyi ngamba ghoha gilo, avo va gu nyi tela khu gututuma ni matshari mandzani; delu u ta wona, u nyi phasa!

⁵ Uwe Pfhumu Nungungulu nya Tshivba Yatshavbo, Uwe Nungungulu wa Israyeli; wuga u ta tsayisa va nya mayigo vava; u nga pweli wusiwana vakanganyisi vava.

⁶ Matshigu yatshavbo va gu wuya silambosile, na va gu huhula kha nga dzimbwa, va dzuwulugela lidhoropa latshavbo.

⁷ Va gu gamba liguvi nya ndzilo nya matshari khu maganani gwawe, na va gu alakanya gukhavo: “Mwalo muthu a va pwago.”

⁸ Aholu uwe Pfhumu Nungungulu, u na va hega vathu nya guralo; uwe u ngu va hega va nya mayigo.

⁹ Eni nyi na emedwa khuwe Nungungulu wangu, khuwe muvhikeli ni wuthavelo wangu.

¹⁰ Khu wuhindzi waye Nungungulu a nata gwangu ata nyi wonisa gupadwa ga valala vangu.

¹¹ Uwe Pfhumu u nga vbedzi valala vangu khu gu va songa, aholu va vbedze tshivba va pepetega ni mayigo, gasi vathu va na gyathu va si divali guvivba gwawe.

¹² Magana ma dugago khu kanani gwawe khya gu ghoha, va na konwe khu gu dzi gugumugisa gwawe kholu va guti gu lipha ni gu valana basi!

¹³ Va vbedze, va fuvise khu likhulo lago! Gasi va fuve tigoni khavbo va na dzitigo gukhavo Khu Nungungulu a fumago Israyeli, wufumu waye wu ngu enedza litigo latshavbo!

¹⁴ Valala vangu va gu wuya vbakari nya wutshigu na va gu huhula kha nga dzimbwa, va dzuwulugela lidhoropa latshavbo.

¹⁵ Va gu legalega dhoropani nga dzimbwa va vbweta gilo nya guhodze va huhula nyamba mana guhodza nya guenele, va gu dzuwulugela wutshigu watshavbo.

¹⁶ Aholu, eni nyi na embelela tshivba yago; dzimindrudzile nyi na khusa lito khu gutsaka nyi dhumisa lihaladzo lago, kholu uwe u khade wuthavelo wangu, nyi thavelago avbo matshigu nya sigaradzo.

¹⁷ Eni nyi na gu dhumisa khu gu embelela ga uwe Nungungulu wangu, kholu u muvhikeli wangu, ni wuthavelo wangu, uwe khuwe Nungungulu nya gutumbege u nyi haladzago.