Dzindzimo 54 - Bhibhiliya Nya Guage

Nombelo nya gulombe gulamuledwa ga valala

Ga muthangeli nya tsawa nya vaembeleli. Khu gitendre. Ndzimo ya Dhavhidhe, a embidego gikhati vazife va ngatago vata embela Sawule, khavo: “Dhavhidhe a ngu ta sihala vbakari gwathu.”

¹ Nungungulu, nyi vbulugise, khu lina lago, nyi lamule khu tshivba yago.

² Uwe Nungungulu yingisa nombelo wangu, neredza dzindzeve dzago u yingisa magana ya kanani gwangu.

³ Kholu va nya mayigo va ngu nyi wugela, va nya wurena va ngu vbweta gu nyi songa; avo kha va theli kota khu Nungungulu.

⁴ Nungungulu khuye muphasedzeli wangu, Pfhumu Nungungulu khuye a sayisago womi wangu.

⁵ Uye a na bweledzela guvivba ga vatshanisi vangu; khu kotani nya gutumbege gwago va mbembisele muphelo.

⁶ Khu gugola gwangu nyi na gu girela miphaso nya dzimhamba; nyi na rungudza lina lago, uwe Pfhumu Nungungulu, kholu u lulamide.

⁷ Kholu u nyi vbulugiside sigaradzoni gwatshavbo; ni maho yangu ma wonide gumbemba gwa valala vangu.