Dzindzimo 50 - Bhibhiliya Nya Guage

Wukhozeli nya lisine

Ndzimo ya Asafi

¹ Pfhumu Nungungulu nya Tshivba Yatshavbo, ganede, a ramba vathu gukhugela Khugadambo kala Pfoladambo.

² Gukhugela Siyoni, wulanga nya gumbure ngudzu, Nungungulu a ngu ngangamela.

³ Nungungulu wathu a nguta, kha nata degula; mbeli gwaye wu ngu dzura nilo nya guvbise; randredwe khu phuvbo nya gingulu.

⁴ Khu vbatshani a ngu ramba sivangwa sa ndzadzini ni mafuni, gasi guta lamula vathu vaye.

⁵ “Tombanisani va nya guaga vangu, vale va nga hunga gidzumeledzwano ni eni khu miphaso.”

⁶ Ndzadzini gu na tivisa gululama gwaye, kholu khuye mune Nungungulu a lamulago.

⁷ “Yingisani, enu vathu vangu! Nyi ngu vbweta gu ganela nanu; gasi gu gu konisela uwe Israyeli. Eni kheni Nungungulu, Nungungulu wago.

⁸ Kha nyi gu kawuki khu kotani nya miphaso yago nya dzimhamba, mwendro miphaso yago nya guvbiswe u nyi girelago gikhati gyatshavbo.

⁹ Kha nyi na hakha ni gikuzyana gimwegyo gya ndrangani gwago, ambari phongo, nya tshambi wago.

¹⁰ Kholu sirengo satshavbo nya likhabi khyangu ni sirengo si guromo umo nya mazanazana nya sigomo.

¹¹ Nyi ngu siti sinyoni satshavbo sa musigomoni, ni sirengo satshavbo sa khabini sa gu lumba eni.

¹² Nari pwani nya gupwa ndzala, khandruwe nyi nga hadza gu gu embela, kholu litigo ni satshavbo si guromo umo khyangu.

¹³ Ina kamwe eni nya gu hodza nyama nya dzimombe, gani? Ina nyi ngu sela novba nya dziphongo, gani?

¹⁴ Ningela ga Pfhumu phaso nya gubonge, u landrisa sisambanyo u giridego ga Uye a Khusegidego ngudzu;

¹⁵ Nyi rane litshigu nya sigaradzo; eni nyi na gu vbanyisa, uwe u na nyi dhumisa.”

¹⁶ Aholu, ga muthu nya guvivbe Nungungulu wari, khuye: Gu na gu phasa ginani gu ganelela sileletelo sangu ni gu huwelela gidzumeledzwano gyangu,

¹⁷ nari gu uwe u ngu nyenya sihevbudzo sangu, ni gu vengela magana yangu, gani?

¹⁸ Uwe wa gu wona mbafa wa gu ya hengela nayo u thangana wupari ni sibhayi.

¹⁹ Wa gu tula likana lago gasi gu ganela guvivba, lidimi lago la gu vbaha malipha.

²⁰ Uwe wa gu khala gasi gu lemba ndriyago ni gu ganela guvivba khu gyanana gya mayi wago.

²¹ U giride silo sesi, aholu eni nyi di degula; u di gu pimisa gukhuwe eni nya gufanane nago; aholu eni nyi na gu lamula nyi gu ninga nandru.

²² Khu guralo, pimisani esi, enu mu divalago Nungungulu, gasi nyi si mi vbadzuleli, mu hamuga ni muthu nya gu mu vbulugise.

²³ Wule a nyi ningago phaso nya gubonge, uyoyo a ngu nyi rungudza; wule a dongiselago ndzila yaye, nyi na mu nonedza guvbanyisa ga Nungungulu.