Dzindzimo 40 - Bhibhiliya Nya Guage

Nombelo nya gubonge ni gu lomba giphaso

Ga muthangeli nya tsawa nya vaembeleli. Ndzimo ya Dhavhidhe

¹ Nyi tumbide Pfhumu Nungungulu khu monyo wangu watshavbo; Uye a di noga a nyi yingisa gikhati nyi nga lomba giphaso.

² A nyi duside phalani nya lufu, seleni mule nya maraga; a emisa migondro yangu vbatshani nya giwindri, a tiyisa mawundru yangu.

³ Vegide kanani gwangu ndzimo nya yiphya, ndzimo nya gurungudze Nungungulu wathu; nya vangi va na si wona silo soso, va na thava ni gu tumba Pfhumu Nungungulu.

⁴ Kategide muthu wule a tumbago Pfhumu Nungungulu, kha thendregedzi a khedzisa va nya matshandza, gambe kha vbweti avo va landrago malipha.

⁵ U hi girede siliwugiso nya singi, Uwe Pfhumu Nungungulu wangu, mwalo muthu a fananago ni uwe, khu makungo u giridego nya guphasedzele ethu; eni nya gu gola gu ma pwadza nyi ma tivisa, aholu ma tade ngudzu nyamba kodza ni gu sayedwa.

⁶ Uwe khwa vbweta miphaso ni miningelo, aholu u nyi tude dzindzeve; khwa lomba miphaso nya sirengo nya guvbiswe, gasi gu handza sighoho sathu.

⁷ Eni nyi di, kheni: “Nyi womo avba, kha nga gu lovidwego libhukuni khu kotani yangu.”

⁸ Nyi ngu tsaka khu gu gira guhaladza gwago, Nungungulu wangu; ndrani nya monyo wangu womo nayo wago.

⁹ Nyi tiviside nayo wa Pfhumu Nungungulu vbakari nya tshangano nya khongolo; kha nya degula likana langu, u ngu dziti gwadi uwe Pfhumu Nungungulu.

¹⁰ Kha nya siha gululama gwago monyoni gwangu, aholu nyi tiviside gutumba ni guvbanyisa gwago; kha nya siha lihaladzo ni lisine lago, vbakari nya tshangano nya khongolo.

¹¹ Pfhumu Nungungulu, u nga bombi gu nyi girela wuhindzi, nyi na vhikedwe gikhati gyatshavbo khu wuhigo ni wuwadi wago.

¹² Nyi randredwe khu dzimhango nyambana tengo; mithumo yangu nya guvivbe yi nyi gamide nyamba kodza ni gu hapfhula nyi wona, yingi ngudzu guvbindra ndzudzu wa hungoni gwangu, nya gu dzipwa na nyi vbede tshivba.

¹³ Nyi vbulugise Pfhumu Nungungulu; vbiredza Pfhumu Nungungulu u ta nyi phasa!

¹⁴ Va na tale khu dzitshoni avo va golago gukhavo nyi nafe; va na bwelele hwane va khala dzitshoni avo va golago gu nyi wona na nyi gu fenengedzwa khu sigaradzo.

¹⁵ Va na degule khu dzitshoni avo va nyi hegago khavo, khavbo gwadi.

¹⁶ Va na nengele va tsaka khu uwe vatshavbo avo va gu vbwetago; avo va golago guvbanyisa gwago va na nengele gikhati gyatshavbo, khavo: “A na khusedzwe Pfhumu Nungungulu.”

¹⁷ Gasi eni nyi gisiwana ni muhamugi, nyi khulungu, aholu Pfhumu a ngu nyi sayisa. Uwe khuwe giphaso ni guvbanyiswa gwangu; Nungungulu wangu, u nga hweli!