Dzindzimo 38 - Bhibhiliya Nya Guage

Nombelo wa muthu a tshanisekago

Ndzimo ya Dhavhidhe. Gasi Nungungulu a mu alakanya

¹ Pfhumu Nungungulu! U nga nyi tsayisi khu likhulo lago ambari gu nyi kawuka nu tade khu likhulo.

² Sighalala sago si nyi hekhide, mandza yago ma ngu nyi sokhovedza.

³ Gi mwalo givbango nya gyadi milini gwangu, khu kotani nya likhulo lago, wu mwalo womi maramboni gwangu, khu kotani nya sighoho sangu.

⁴ Kholu mithumo yangu nya guvivbe yi tade, yi langaladza hungo wangu; yi ngu nyi gikha kha nga rwalo nya gulemele.

⁵ Silondra sangu nya makhoro si fufutide si duga wusila, khu kotani nya wuphuguphugu wangu.

⁶ Nyi nogide ngudzu nyi gamega guvbindra pimo, litshigu latshavbo nyi gimbila na nyi gu lila.

⁷ Giwunu gyangu gya gu vbisa ngudzu gu mwalo givbango nya gyadi milini gwangu;

⁸ nyi rerekide nyi thega vbavbatshi nyi ngu keta khu kotani nya gusaniseke nya monyo wangu.

⁹ Pfhumu, gusuva gwangu gomo mbeli gwago, khu hangwi khu gudilela gwangu.

¹⁰ Monyo wangu wa gu ghavata ngudzu, tshivba yangu yi ngu vbela; wu tshimegide wenengedzo nya maho yangu.

¹¹ Dzipari ni vangana vangu va nyi digide ni sigaradzo sangu, ni valongo vangu va gu ema khu hwindzo.

¹² Va ngu nyi riyela milaphwi avo va zamago gu nyi songa; avo zamago gu nyi tshongisa, va gu ganela guvivba, va luga gikungo nya gukanganyise litshigu latshavbo.

¹³ Aholu eni nya gu fanana ni givbwiri nyi sipwi, kha nga gidudu gi si tuligo likana.

¹⁴ Nyi womo kha nga muthu nya mbapwa, oyu a gumba ninga phindrulo khu kanani gwaye.

¹⁵ Khu guralo, Pfhumu Nungungulu eni nya gu tumba uwe; khuwe u na gu ningago phindrulo, uwe Pfhumu Nungungulu wangu.

¹⁶ Kholu eni nyi di gukheni: “Va nga ghiyi kheni ngondro wangu wa gu kwiriga.”

¹⁷ Khidzo kamwe, nyi womo vbafuvbi nya guthege; sigaradzo gikhati gyatshavbo somo mbeli gwangu.

¹⁸ Nyi ngu dawulela guvivba gwangu; nyi ngu tshaniseka khu kotani nya gighoho gyangu.

¹⁹ Aholu valala vangu va ngu vbanya va na ni tshivba, vangi va nyi zondrago nyambana nandru.

²⁰ Avo va bweledzago wuwadi khu wuvivbi, va gu khala valala vangu, kholu eni nya gu landrisa wuwadi.

²¹ U nga nyi digi Pfhumu, Nungungulu wangu, u nga khali hwindzo ni eni.

²² Vbiredza u ta nyi phasa Pfhumu, muvbanyisi wangu.