Dzindzimo 3 - Bhibhiliya Nya Guage

Nombelo nya gulombe guphaswa khu Nungungulu

Ndzimo ya Dhavhidhe, gikhati a nga bani na gu tutumiswa khu mwanaye Abhisalamo

¹ Pfhumu Nungungulu, idzo va tadego khidzo valala vangu! Vangi ngudzu avo va nyi wugelago!

² Vangi ngudzu avo va nyi embelago, khavo: “Gima kha na nga vbanyiswa khu Nungungulu.”

³ Aholu, uwe Pfhumu Nungungulu, u gitshangu gyangu, khuwe wuzundzo wangu, khuwe u nyi khusedzago.

⁴ Nyi ngu khusa lito nyi rana Pfhumu Nungungulu, uye a ngu nyi hakha khu gigomoni gwaye nya gukatege.

⁵ Nyi ngu lala nyi mana ligovbe; nyi wuga, kholu Pfhumu Nungungulu a ngu nyi sayisa.

⁶ Kha nyi thavi talo nya vathu va nyi randredego khu maphuvbo yatshavbo.

⁷ Wuga, Pfhumu Nungungulu! Nyi vbanyise Nungungulu wangu, kholu uwe u ngu veta siwombo sa valala vangu, u kunulela magwaha ya sighohi.

⁸ Guvbanyiswa gwa guta khu ga Pfhumu Nungungulu, u tshisa makategwa ga vathu vago.