Dzindzimo 26 - Bhibhiliya Nya Guage

Nombelo wa muthu nya gululame

Ndzimo ya Dhavhidhe

¹ Nyi lamule, Pfhumu Nungungulu, kholu nyi lulamide guvbanyani gwangu; nyi ngu tumba Pfhumu Nungungulu nyamba kanakana.

² Nyi khedzise, Pfhumu Nungungulu, nyi linge, wona gugola nya monyo wangu ni mipimiso yangu;

³ mahoni gwangu nya gu wona lihaladzo lago, nyi ngu gimbila lisineni gwago.

⁴ Kha nyi khali dangamwedo ni sidambane, kha nyi gimbili ndzila mweyo ni vakanganyisi;

⁵ nyi ngu yi nyenya mitshangano ya va nya guvivba, kha nyi khali gumogo ni sighohi.

⁶ Nyi ngu hamba mandza yangu na nyi agide monyo, gasi nyi hidzimela vbagiluvelotunu gwago Pfhumu Nungungulu,

⁷ nyi embelela ndzimo nya gubonge, nyi huwelela siliwugiso sago satshavbo.

⁸ Pfhumu Nungungulu, eni nyi ngu gola wumburi nya Nyumba yago, ni wulanga wu wonegago avbo wudhumo wago.

⁹ U nga nyi pati gumogo ni sighohi, guvbanya gwangu u nga gu pati ni sighevenga;

¹⁰ Avo va na ni gunyenyeza mandzani gwawe, mandza yawe ya nyamudye ma limade khu gu rengelela.

¹¹ Gasi eni, nyi lulamide guvbanyani gwangu, nyi tshule, nyi pwele wuhindzi.

¹² Migondro yangu yi tiyide ndzilani nya gululame, eni nyi ngu gu rungudza Pfhumu Nungungulu vbakari nya tshangano.