Dzindzimo 24 - Bhibhiliya Nya Guage

Guta ga Mufumeli nya wudhumo

Ndzimo ya Dhavhidhe

¹ Litigo la gu lumba Pfhumu Nungungulu, ni satshavbo si guromo ga ilo, mafu ni vatshavbo va vbanyago mafuni.

² Uye mune a li vbahide vbatshani nya yiphwa a li tiyisa vbatshani nya mitsongo.

³ Khu mani a dzi kodzago gu gwela gigomoni gya Pfhumu Nungungulu? Khu mani a dzi kodzago gu khala wulangani gwaye nya guage?

⁴ Khu uye a gu ni mandza ma lulamidego a gu ni monyo wu agidego, a si tumbigo vanungungulu nya malipha, a si sambanyigo malipha.

⁵ Uyoyo a na hakha gikategiso gya Pfhumu Nungungulu, a na mana gu vhikedwa khu Nungungulu, muvbanyisi waye.

⁶ Oyu khu melana nya ava va vbwetago Pfhumu Nungungulu, ava va vbwetago khovbe yago, uwe Nungungulu wa Jakobe.

⁷ Enu myanya, khusedzani mihungo yanu; khusegani enu malimba ya gale, gasi a bela Mufumeli nya Wudhumo!

⁸ Khu mani Mufumeli yoyo nya Wudhumo? Khu Pfhumu Nungungulu nya Tshivba Yatshavbo, Khu Pfhumu Nungungulu, mupali nya dzinyimbi.

⁹ Myanya khusedzani mihungo yanu; khusedzani enu malimba ya gale, kholu a ngu bela Mufumeli nya Wudhumo.

¹⁰ Khu mani Mufumeli yoyo nya Wudhumo? Khu Pfhumu Nungungulu nya Tshivba Yatshavbo. Khuye a gu Mufumeli nya Wudhumo.