Dzindzimo 20 - Bhibhiliya Nya Guage

Nombelo nya gugiredwe mufumeli

Ga muthangeli nya vaembeleli. Ndzimo ya Dhavhidhe

¹ Pfhumu Nungungulu a na gu hakhe litshigu nya sigaradzo, Lina la Nungungulu wa Jakobe li na gu vhikele!

² Khu nyumbani nya guage a na gu rumele giphaso, a gu phara gwadi gukhugela Siyoni!

³ A na alakanye miningelo yago yatshavbo, a tsakiswa khu phaso wago nya guvbiswe.

⁴ A na gu ninge esi monyo wago wu suvago, a tiyisa satshavbo u pimisago gu gira!

⁵ Hi na mane gunengela khu gupala gwago, hi khusedza ngavbya khu lina la Nungungulu wathu! Pfhumu Nungungulu a na tadzise gu lomba gwago gwatshavbo!

⁶ Olu nyi ngu dziti nya gukheni Pfhumu Nungungulu, a ngu vbanyisa gihathwa gyaye; a ngu gi hakha khu nyumbani gwaye nya guage ndzadzini, khu siliwugiso sa nyamudye gwaye nya guvbanyise.

⁷ Vambe va gu tumba dzikareta, vambe va tumba dzikavalu; gasi ethu ha gu rana lina la Pfhumu Nungungulu wathu.

⁸ Avo va gu tshunganela va thega; ethu ha gu khuga hi ema na hi tiyide.

⁹ Pfhumu Nungungulu a na vbanyise mufumeli; ha gu gu rana hi hakhe.