Dzindzimo 19 - Bhibhiliya Nya Guage

A na rungudzwe Pfhumu Nungungulu muvangi ni muwumbi

Ga muthangeli nya tsawa nya vaembeleli. Ndzimo ya Dhavhidhe

¹ Ndzadzini gu ngu tivisa wudhumo wa Nungungulu, ndrengelenge wu ngu tivisa sigiro nya mandza yaye.

² Litshigu la gu ningedza mahungu ga limbe litshigu, wutshigu wa gu ma tivisa ga wumbe wutshigu,

³ nyambana lidimi, nyambana magana, kha gu pwali lito vbakari gwawe.

⁴ Ambari ulo gudzuma gwawe gu ngu pwala tigoni gwatshavbo, lito lawe li ngu pwala kala mahegiso nya mafu; khiyo a vbahedego tshatsha lidambo.

⁵ Ilo la gu duga kha nga mudzegi a dugago khu makhuvini, kha nga ndrena yi gimbilago ndzilani na yi tsakide.

⁶ Ilo la gu wonega mahegiso ga Khugadambo, li hegisa liendro laye mahegiso ga Muhwadambo, gi mwalo gilo gi si furumedzwigo khu lihani laye.

⁷ Nayo wa Pfhumu Nungungulu wu lulamide, wu ngu hefemudza monyo; wufakazi wa Pfhumu Nungungulu wu tiyide, gihevbudzo ga oyu nyambati gilo.

⁸ Sileletelo sa Pfhumu Nungungulu si lulamide, si ngu tsakisa monyo, guruma ga Pfhumu Nungungulu gomo safani, gu ngu wenengedza maho.

⁹ Githawo ga Pfhumu Nungungulu, gi agide kala gupindruga, gulamula ga Pfhumu Nungungulu lisine, gu tade khu gululama.

¹⁰ Gu ngu tsakisa ngudzu guvbindra ndralama nya gutale, ni siwindri nya lisima ngudzu; magana yaye ma ngu lombela ngudzu guvbindra wulombe.

¹¹ Ni githumi gyago gi ngu ningwa khayo guti; oyu a ma landrisago, a na mana tshatshazelo.

¹² Khu mani a kodzago gu tugula abune sihoso saye? Nyi handze siwono si sihadego!

¹³ Tshula matshandza githumi gyago, gasi nyi si fumedwi khayo, khavbo nyi na khalago muthu nya gululame, nyi vbuluga nandru nya wukhongolo ngudzu.

¹⁴ Magana yangu ma na gu tsakise, ni mahingigedzo ya monyoni gwangu ma na vbohe mbeli gwago, Pfhumu Nungungulu, muvhikeli ni muvbanyisi wangu.