Dzindzimo 16 - Bhibhiliya Nya Guage

Gunengela nya sihathwa

Ndzimo ya Dhavhidhe

¹ Nyi vegedze, uwe Nungungulu kholu nya gu tumba uwe.

² Nyi di embela Pfhumu Nungungulu, kheni: “Uwe Pfhumu yangu, khuwe thomba yangu yatshavbo; gimwalo gimbe gilo nya guvbindre uwe.”

³ Vanungungulu nya malipha va mafuni, avo va gupwani va na ni tshivba, avo gale nyi nga bani nyi va khozela, kha va phasi gilo.

⁴ Avo va khozelago vanungungulu nya malipha, va gu dzi tadzela vanungungulu, va engedzela gutshaniseka gwawe. Eni gima kha nyi na hengela navo wughevenga wawe, likana langu gima kha li na rana malina yawe.

⁵ Pfhumu Nungungulu, uwe u thomba ni gikombe gyangu, khuwe u pharidego guvbanya gwangu.

⁶ Nyi kabanisidwe giavelo malangani ma nyi tsakisago, lisine, nyi ningidwe thomba nya yadi ngudzu.

⁷ Nyi ngu rungudza Pfhumu Nungungulu a nyi layago, ni vbakari nya wutshigu, monyo wangu wu ngu nyi dundrugisa.

⁸ Gikhati gyatshavbo nya gu vega Pfhumu Nungungulu mbeli gwangu, khu guralo, uye khade nyamudye gwangu, gima kha nyi na thava gilo.

⁹ Khu guralo, monyo wangu wu ngu nengela, lidimi langu li ngu kulungela, ni givili gyangu gi ngu hefemula na gi tangade.

¹⁰ Kholu khu na diga guvbanya gwangu phalani nya vafi; khu na diga gihathwa gyago gifa.

¹¹ U na nyi yeyedza ndzila nya guvbanye, nyi na tala khu gutsaka mbeli gwago, nyi napwa gutshamba nyamudye gwago kala gupindruga.