Dzindzimo 150 - Bhibhiliya Nya Guage

Ndzimo nya guhegise nya gurungudze Pfhumu

¹ Aleluya! Dhumisani Pfhumu Nungungulu! A na dhumiswe Nungungulu wulangani gwaye nya guage; mu dhumiseni ndzadzini a gu likhokhola nya tshivba yaye!

² Mu dhumiseni khu sigiro saye nya tshivba; mu dhumiseni khu wugulu waye watshavbo.

³ Mu dhumiseni na mu gu womba mipundru; mu dhumiseni khu sitendre ni mihwambi!

⁴ Mu dhumiseni khu dzingoma ni guhana; mu dhumiseni khu mihwambi ni misengele.

⁵ Mu dhumiseni khu sikhitshi nya gudzume; mu dhumiseni khu gudzuma nya dzingoma!

⁶ Sivangwa satshavbo nya guvbanye si dagatago si na dhumise Pfhumu Nungungulu! Aleluya! A na dhumiswe Pfhumu Nungungulu!