Dzindzimo 149 - Bhibhiliya Nya Guage

Ndzimo nya gubonge

¹ Aleluya! Dhumisani Pfhumu Nungungulu! Embelelani ga Pfhumu Nungungulu ndzimo nya yiphya; mu dhumiseni tshanganoni nya sihathwa saye.

² Israyeli a na nengele ga Muvangi waye, vathu va Siyoni va na tsakele Pfhumu yawe.

³ Va na dhumise lina laye khu gu hana, va embelela na va gu womba sitendre ni dzingoma.

⁴ Kholu Pfhumu Nungungulu a ngu tsakiswa khu vathu vaye; va nya gusolega, a gu va ninga wuzundzo nya gupale.

⁵ Avo va khodwago va na tsake khu wudhumo wa Nungungulu, va na embelele khu gunengela na va lade vbamalawutunu gwawe.

⁶ Va na khusedze lito va pwadza gwadi wuzundzo wa Nungungulu, na va pharide mandzani matshari nya gulodzwe eno ni eno,

⁷ gasi va phodze ga va nya mayigo ni gu tsayisa vathu;

⁸ gasi va hungelela vafumeli vawe khu makhetshe, ni vakhongolo vakone khu madzoke nya dzisimbi;

⁹ gasi va lamule mayigo khu edzi gu lovidwego khidzo, owu khuwo wuzundzo nya sihathwa saye satshavbo. Aleluya! A na dhumiswe Pfhumu Nungungulu!