Dzindzimo 146 - Bhibhiliya Nya Guage

Ndzimo nya gudhumise Nungungulu muvbanyisi

A na dhumiswe Pfhumu Nungungulu!

¹ Aleluya! Dhumisani Pfhumu Nungungulu! Uwe hefemulo wangu, dhumisa Pfhumu Nungungulu!

² Nyi na rungudza Pfhumu Nungungulu matshigu yatshavbo nya guvbanye gwangu; gikhati gyatshavbo nyi na vbanyago nyi na embelela dzindzimo nya wuzundzo ga Nungungulu wangu.

³ Mu nga tumbini vafumeli mwendro sanana nya vathu, va gu mwalo tshivba nya gu mi vbanyise.

⁴ Wa gu vbindra hefemulo wawe, va gu wuya va khala kudzudzwane; ga ilo litshigu, ma gu hegisa guralo makungo yawe yatshavbo.

⁵ Kategide uye a manago giphaso ga Nungungulu wa Jakobe, uye a vegago gitumbo ga Pfhumu Nungungulu waye

⁶ a nga vanga ndzadzi, mafu ni linene, ni satshavbo si guromo umo, a tumbegidego gikhati gyatshavbo;

⁷ Uye a lamulelago avo va saniswago, a ningago guhodza avo va gu ni ndzala. Pfhumu Nungungulu a ngu tshula avo va khothedwego.

⁸ Pfhumu Nungungulu a ngu tula maho sikhumu, a gu wusa avo va vbelago tshivba; Uye a ngu gola vale va lulamidego.

⁹ Pfhumu Nungungulu a ngu emela valuveli; a ngu tangadzisa dzikhulungu ni dzinoni, gambe a ngu segela dzindzila va nya guvivba.

¹⁰ Pfhumu Nungungulu a na fuma kala gupindruga; Nungungulu wago uwe Siyoni, a na fuma mimela yatshavbo kala gupindruga. Aleluya! A na dhumiswe Pfhumu Nungungulu!