Dzindzimo 142 - Bhibhiliya Nya Guage

Nombelo nya muthu a saniswago

Ndzimo nya sileletelo sa Dhavhidhe. Nombelo a nga gira na sihade phagoni

¹ Nyi ngu khusa lito nyi womba huwa ga Pfhumu Nungungulu; nyi ngu lombelela ga Pfhumu Nungungulu.

² Nyi ngu vega sigaradzo sangu mbeli gwaye, nyi mu bikela gusaniseka gwangu.

³ Avbo nyi vbelago tshivba, uwe u ngu giti igyo nyi yelago gu gira. Ndzilani nyi gimbilago, va dembide milaphwi va nyi riya.

⁴ Khedzisa gwadi maphuvbo yatshavbo, mwalo a thelago kota khu eni, kholu nyi mwalo wulanga nya guthavele avbo.

⁵ Nyi di rana uwe Pfhumu Nungungulu, kheni: “Uwe khuwe wuthavelo wangu; khuwe thomba yangu tigoni nya vathu va vbanyago.

⁶ Yingisa gulila gwangu, nyi mwalo gambe tshivba; nyi vbulugise ga avo va nyi tshanisago, kholu va ngu nyi pala khu tshivba.

⁷ Nyi duse pasoni momu, gasi nyi rungudze lina lago; nyi na randredwa khu vathu nya gululame, wa gu nyi ninga makategwa.”