Dzindzimo 140 - Bhibhiliya Nya Guage

Gulomba gu vhikedwa ga nala

Ga muthangeli nya tsawa nya vaembeleli. Ndzimo ya Dhavhidhe

¹ Pfhumu Nungungulu nyi vbulugise ga vathu nya guvivbe, nyi vhikele ga vathu nya sighevenga;

² avo va gu kho va alakanyela guvivba monyoni gwawe; matshigu yatshavbo va gu tshangana va wusa mayunga.

³ Va gu lodza malimi yawe gukhwatshi dzinyoga, magana yawe kha nga wuhungu nya mamba.

⁴ Nyi vhikele Pfhumu Nungungulu mandzani ya va nya guvivba; nyi vhikele ga vathu nya sighevenga, va lugago makungo nya gu nyi these vbavbatshi.

⁵ Va nya matshandza va dembide mazinga va nyi riya, va riyide ligoga ndzilani gwangu, va dembide dzingodzi gasi gu nyi mola khidzo.

⁶ Eni nyi di ganela ga Pfhumu Nungungulu, kheni: “Uwe khuwe Nungungulu wangu; yingisa huwa nya gulile gwangu.”

⁷ Uwe Pfhumu Nungungulu wangu, muvhikeli wangu nya tshivba, u nyi vhikede u nyi emela litshigu nya litunga.

⁸ Pfhumu Nungungulu, u nga ningi va nya guvivba esi va si vbwetago; u nga dzumeli gukhuwe makungo yawe nya guvivbe maye mbeli, gasi va si ghiyi.

⁹ U nga ningi tshivba valala vangu, va nyi pala magana nya guvivbe va nyi valago khayo, ma na va thegele mihungoni gwawe.

¹⁰ Magala nya gungangamele, ma na thegele vbatshani gwawe; va na rinywe niloni ni phalani nya guete nyamba duga gambe.

¹¹ Vathu nya malipha va na fuve mafuni, muthu nya dzihanyi a na thegedwe khu libango kala li mu mbembisa.

¹² Pfhumu Nungungulu, nyi ngu dziti gukheni u ngu lamulela gisiwana, u ngu lulamisa mahungu ya ava va hamugago.

¹³ Khu guralo, vathu nya gululame, va na rungudza lina lago, vathu nya lisine, va na vbanya mbeli gwago.