Dzindzimo 135 - Bhibhiliya Nya Guage

Nungungulu fanede gu Dhumiswa!

¹ Aleluya! Dhumisani Pfhumu Nungungulu! Dhumisani lina Laye; li dhumiseni enu sithumi saye.

² Enu mu guromo Nyumbani ga Pfhumu Nungungulu, dzinyangwani nya Nyumba ya Nungungulu wathu.

³ Dhumisani Pfhumu Nungungulu, kholu khwadi, embelelani mu dhumisa lina laye kholu li handzegide.

⁴ Uye hathide Jakobe gu khala waye, ni va na Israyeli gu khala thomba yaye.

⁵ Kholu nyi ngu dziti gwadi gukheni Pfhumu Nungungulu khongolo, ni gu, Nungungulu wathu womo vbatshani guvbindra vanungungulu vatshavbo.

⁶ Kholu satshavbo a si vbwetago a ngu si gira, ndzadzini ni mafuni, linene ni malangani yatshavbo nya guete.

⁷ Khuye a wusago mapfhi gukhugela mahegiso nya mafu; khuye a girago gulasa ni mabara, guwa ndzadzi; a tulela phuvbo yi duga khu gukhothedwani gwaye.

⁸ Khuye a nga songa sanana nya matiwula sa Egipito, gukhugela matiwula nya vathu kala ni matiwula nya sifuyo;

⁹ giride sisamadziso ni siliwugiso vbakari gwago uwe Egipito, gasi gu tsayisa Faro gumogo ni vathu vaye vatshavbo;

¹⁰ khuye a sasedego vathu nya mayigo nya gutale, a songa vafumeli nya tshivba.

¹¹ Bayiside Seyoni, mufumeli wa Vaamori, a songa Ogi, mufumeli wa Bhasani ni vafumeli vatshavbo Vakhanani.

¹² Mayigo ya vafumeli vovo a di ma dzega a ninga va na Israyeli, a ma gira thomba ya vathu vaye.

¹³ Lina lago Pfhumu Nungungulu, li na simama kala gupindruga; Pfhumu Nungungulu u na alakanywa khu situgulwana ni situgulwana.

¹⁴ Kholu Pfhumu Nungungulu a na emela vathu vaye ni gu pwela wusiwana sithumi saye.

¹⁵ Vanungungulu va mambe mayigo va gu wumbwa khu parata ni ndralama, sigiro nya mandza nya vathu.

¹⁶ Va na ni magana, aholu kha va ganeli; va na ni maho, aholu kha va woni.

¹⁷ Va na ni dzindzeve, aholu kha vapwi; kholu va mwalo hefemulo maganani gwawe.

¹⁸ Va na fanane ni sithombe soso, avo va si wumbago ni vatshavbo va khodwago ga iso.

¹⁹ Enu va na Israyeli, dhumisani Pfhumu Nungungulu; Ndranga ya Aroni dhumisani Pfhumu Nungungulu;

²⁰ Enu sanana sa Levhi dhumisani Pfhumu Nungungulu; dhumisani Pfhumu Nungungulu enu mu Mu ningago githawo.

²¹ Enu mu vbanyago Siyoni dhumisani Pfhumu Nungungulu a khalago Jerusalema! Aleluya! A na dhumiswe Pfhumu Nungungulu!