Dzindzimo 132 - Bhibhiliya Nya Guage

Gitumbiso gya gale

Ndzimo ya avo va gwelago nombelotunu

¹ Uwe Pfhumu Nungungulu, u nga divali Dhavhidhe, mugulingwani gwaye gwatshavbo;

² kha nga edzi a nga sambanyago khidzo ga Pfhumu Nungungulu ni gitumbiso a giridego ga Nyadzitshivbe wa Jakobe, a ganela, khuye:

³ “Kha nyi na bela nyumbani gwangu nyi vbanyago umo, ambari gu lita vbadawutunu nyi hefemulago avbo,

⁴ kha nyi na sega maho yangu khu ligovbe, ni gu wotela kha nyi na wotela

⁵ nyamba hegula khu gu vbwetela wulanga Pfhumu Nungungulu, nyumba nya guvbanyele umo Nyadzitshivbe wa Jakobe.”

⁶ Hi pwide gupwani ngasa nya gidzumeledzwano yomo Efrata, aholu hi diya yi manela thembweni ga Jahari.

⁷ Hi na bele nyumbani gwaye nya guage; hi na khidzime mbeli nya gigandredzelo nya migondro yaye.

⁸ Delu, Pfhumu Nungungulu, ni Ngasa nya Gidzumeledzwano, a gu giwonegiso nya tshivba yago, u ta bela nyumbani gwago nya guhefemule umo.

⁹ Gikhati gyatshavbo vaphasi vago nya mhamba va na gire esi si lulamidego, avo va khodwago gwago va na kulungele khu gutsaka.

¹⁰ Khu kotani nya lihaladzo ga githumi gyago Dhavhidhe, u nga pfhurareli mufumeli u mu hathidego.

¹¹ Pfhumu Nungungulu, giride gitumbiso ga Dhavhidhe, Kha na nga vbindrugedza, a bwelela hwane, a di khuwe: “Moyo nya gyanana gyago nyi na mu gira mufumeli, nyi na mu khadzisa vbagikhalotunu nya wufumu wago.

¹² Sanana sago sa gu vegisa pwanano wangu ni sileletelo nyi va hevbudzidego, sanana sawe niso si na khala vbagikhalotunu nya wufumu wago kala gupindruga.”

¹³ Kholu Pfhumu Nungungulu hathide gigomo gya Siyoni, a gi gode gu khala wulanga waye nya gu hefemulele avbo.

¹⁴ A di khuye: “Owu wu na khala wulanga wangu kala gupindruga, nyi na vbaha avba, kholu owu wulanga nyi wu tsakede.

¹⁵ Ndranga yeyi nyi na yi kategisa yi fuma guhodza nya gungi; nyi na hodzisa sisiwana saye si khura.

¹⁶ Nyi na ninga vaphasi vago nya mhamba tshivba nya gu lamule vambe, va na kulungela khu gutsaka vale va khodwago gwaye.

¹⁷ Nyi na wusa vbale tshivba nya wufumu wa Dhavhidhe, nyi nyi dongisela wenengedzo wa mufumeli nyi mu hathidego.

¹⁸ Nyi na thela dzitshoni valala vaye; aholu uye a na fuma khu wuzundzo ni wudhumo.”