Dzindzimo 13 - Bhibhiliya Nya Guage

Nombelo nya gukhodwe

Ga muthangeli nya tsawa nya vaembeleli. Ndzimo ya Dhavhidhe

¹ Pfhumu Nungungulu, kala lini nu nyi divala sago? U na nyi divala muphelo, u nyi sihela khovbe yago, gani?

² Kala lini hefemulo wangu na wu gu vila, monyo wangu na wu gu kukutelana matshigu yatshavbo khu wuvi? Kala lini nala wangu a na simamago gu nyi khozisa?

³ Pfhumu Nungungulu wangu, nyi thele kota! Nyi wone u nyi hakha! Wenengedza maho yangu gasi nyi si hungwi khu ligovbe nya gufe.

⁴ Gasi nala wangu a nga ganeli, khuye: “Nyi mu pade,” vale va nyi nyenyago, va nga nengeli khu gu wona gupalega gwangu.

⁵ Eni nyi tumbide wuhigo wago; monyo wangu wu na nengela, kholu u na nyi vbanyisa.

⁶ Nyi na embelela nyi rungudza Pfhumu Nungungulu, khu makategwa a nyi ningidego.