Dzindzimo 127 - Bhibhiliya Nya Guage

Satshavbo sa guta khu ga Nungungulu

Ndzimo ya avo va gwelago nombelotunu. Ndzimo ya Solomoni

¹ Nyumba ya gumba vbahwa khu Pfhumu Nungungulu, thumo watshavbo wa vavbahi kha wu phasi gilo; lidhoropa la gumba woneledwa khu Pfhumu Nungungulu, vakhedziseli va gu pilekelana mahala.

² Kha gu mi phasi gilo gu phindrula ni dzimindru dzikhongolo, mu thuma kala vbakari nya wutshigu, mu fela gu hodza mihandro nya lithonga lanu, Nungungulu a ngu hodzisa sigodwa saye ambari na si lade.

³ Sanana giningwa hi hakhago khu ga Pfhumu Nungungulu, gu mana sanana gukatega.

⁴ Sanana a velegago muthu na ngari muphya, sa gu fanana ni siholoma mandzani nya ndrena.

⁵ Kategide muthu a gu ni siholoma nya singi nya nga isoso; kha na nga thega dzitshoni a gu ema mbeli ga valala vaye phathani, nyangwani nya lidhoropa.