Dzindzimo 116 - Bhibhiliya Nya Guage

Nombelo nya gubonge

¹ Nyi ngu mu haladza Pfhumu Nungungulu, kholu pwide lito nya nombelo wangu.

² Kholu neredzidego dzindzeve dzaye a nyi yingisa; nyi na lombelela gwaye matshigu yatshavbo nya guvbanye gwangu.

³ Nyi hungidwe khu dzitshinga nya lufu, ligoga nya lithowo li di nyi mode, eni nyi di tala khu guthava ni gusaniseka.

⁴ Aholu nyi di rana lina la Pfhumu Nungungulu, kheni: “Pfhumu Nungungulu, gira wuhindzi u nyi vbanyisa.”

⁵ Pfhumu Nungungulu a na ni gisiro ni gululama; Nungungulu wathu a na ni wuhindzi.

⁶ Pfhumu Nungungulu a gu vhikela avo va gu mwalo lipindru; gikhati nyi nga bani nyi vbede tshivba, uye a di nyi vbulugisa.

⁷ Hefemulo wangu, waya gurulani gwago, kholu Pfhumu Nungungulu a gu kategiside.

⁸ Kholu uye Pfhumu a nyi vbulugiside gufa; a nyi bavbula marongo mahoni gwangu, a nyi vbulugisa guthega.

⁹ Khu guralo, nyi na gimbila mbeli ga Pfhumu Nungungulu, tigoni nya vathu va vbanyago.

¹⁰ Eni nyi di gu simama gukhodwa, ambari nyi nga, kheni: “Guvbisega gwangu gukhongolo.”

¹¹ Khu gu vbela tshivba nyi di kala nyi ganela, kheni: “Vathu vatshavbo kha va tumbegi.”

¹² Nyi na bongisa guwani Pfhumu Nungungulu, khu wuwadi watshavbo a nyi giredego?

¹³ Nyi na khusedza gikombe nya guvbanyise, nyi rana lina laPfhumu Nungungulu.

¹⁴ Nyi na landrisa sisambanyo nyi giridego ga Pfhumu Nungungulu, olu na nyi gu wonwa khu vathu vatshavbo.

¹⁵ Gu na ni lisima mahoni ga Pfhumu Nungungulu gufa ga sihathwa saye.

¹⁶ Uwe Pfhumu Nungungulu, eni nyi githumi gyago, nyi gyanana gya githumi gyago nya nyamayi; uwe u kavilede dzitshinga nyi nga bani nyi hungidwe khidzo.

¹⁷ Nyi na gu ninga miphaso nya gubonge, nyi na lombelela linani la uwe Pfhumu Nungungulu.

¹⁸ Nyi na landrisa sisambanyo nyi giridego ga Pfhumu Nungungulu; na nyi gu wonwa khu vathu vatshavbo,

¹⁹ makupakupani nya Nyumbani ga Pfhumu Nungungulu, vbakari gwago uwe Jerusalema! Aleluya! A na dhumiswe Pfhumu Nungungulu!