Dzindzimo 114 - Bhibhiliya Nya Guage

Guduga khu tigoni ga Egipito

¹ Gikhati Israyeli a dugidego khu Egipito, gikhati nyumba ya Jakobe yi khugidego khu tigoni nya valombo,

² Judha gu di khala Wulanga nya guage, ni Israyeli gu di khala wulanga nya wufumu waye.

³ Yiphwa, na yi si wone esi yi di tutuma; tsongo wa Joridhani wu di bwelela hwane.

⁴ Sigomo si di ndragandraga kha nga dzihamba, ni sigomwana kha nga sinvutana nya tshambi.

⁵ Uwe yiphwa, ginani gi nga gu girago u tutuma? Nuwe Joridhani, khu ginani u nga bwelela hwane?

⁶ Enu sigomo, khu ginani mu ndragandraga kha nga dzihamba? Ni enu sigomwana, kha nga sinvutana nya tshambi?

⁷ Uwe litigo, ndrendremela mbeli ga Pfhumu, mbeli ga Nungungulu wa Jakobe,

⁸ a nga vbindrugedza giwindri gi khala litsiva nya mati, ni giwindri nya gutiye gi khala gibuga nya mati.