Dzindzimo 107 - Bhibhiliya Nya Guage

LIBHUKU NYA LIVBANDRE Nungungulu a ngu vbulugisa

¹ Rungudzani Pfhumu Nungungulu kholu khwadi, kholu wuhindzi waye wu ngu simama kala gupindruga.

² Va na ganele vale Pfhumu Nungungulu a va vbanyisidego, vale a va tshudego mandzani ya valala,

³ ni vale a va tombanisidego khu mayigoni ya Wuronga ni ya Marandzi, ya Khugadambo ni ya Muhwadambo.

⁴ Va di dzimede va legalega giwulani nya gihala, nyambana ndzila nya guye dhoropani nya guvbanye umo.

⁵ Va di saniswa khu ndzala ni lidora, mihefemulo yawe yi di rereka yi vbela tshivba.

⁶ Aholu vbakari nya sigaradzo sawe, va di lila ga Pfhumu Nungungulu, uye a di va vbanyisa sigaradzoni gwawe.

⁷ A di va nonedza ndzila nya yadi nya gululame, gasi guya khiyo dhoropani nya guvbanyele umo.

⁸ Rungudzani Pfhumu Nungungulu khu lihaladzo laye, khu mithumo nya gusamadzise a girelago vathu!

⁹ Kholu sedzide vathu a va tshima lidora lawe, a ninga guhodza nya guenele avo va pwago ndzala.

¹⁰ Va di gu vbanya gidemani ni mwedzini nya gufe, na va hungeledwe khu sisaniso ni makhetshe,

¹¹ khu kotani nya guyeyise ni guwugela Nungungulu, ni gu nyenya makungo ya oyu a Khusegidego ngudzu,

¹² Nungungulu a di va rwega sigaradzo nya sikhongolo; va garala va thega nyamba mana muthu nya gu va phase.

¹³ Aholu vbakari nya sigaradzo sawe va di lila ga Pfhumu Nungungulu, uye a di va vbanyisa ga sigaradzo sawe.

¹⁴ A di va dusa gidemani ni mwedzini nya lufu, a gu kavilela makhetshe yawe.

¹⁵ Rungudzani Pfhumu Nungungulu khu lihaladzo laye, khu mithumo nya gusamadzise a girelago vathu!

¹⁶ Kholu pandrelede malimba nya sikete, a fanyeledzela migonyo nya dzisimbi.

¹⁷ Vambe va di khala sipumbu khu kotani nya sighoho sawe, vambe va dwala khu kotani nya mithumo yawe nya guvivbe.

¹⁸ Gu mwalo guhodza va nga bani va gu dzumela, va diri vbafuvbi nya guhadza gufa.

¹⁹ Khu guralo, vbakari nya sigaradzo sawe va di lila ga Pfhumu Nungungulu, uye a di va vbanyisa ga sigaradzo sawe.

²⁰ A di rumela magana Yaye aya va vbanyisa, a va vbulugisa gufa.

²¹ Rungudzani Pfhumu Nungungulu khu lihaladzo laye, khu mithumo nya gusamadzise a girelago vathu!

²² Mu ningeni miphaso nya dzimhamba nya gubonge, mu tivisa mithumo yaye khu gutsaka.

²³ Vale va tsemakanyago linene khu mataro, va gira wugwewo vbakari nya mati nya makhongolo.

²⁴ Avo va wonide sigiro sa Pfhumu Nungungulu, ni silo nya gusamadzise a girago phwani nya guete.

²⁵ Kholu a ngu dzina a wusa phuvbo nya yikhongolo yi khusedza mavimbi nya tshivba linene.

²⁶ Ma khusedzwa vbatshani ndzadzini, ma wuya ma reledzwa kala guetani nya nondrwa, ni mihefemulo yawe yi di nyega khu gu thava mhango.

²⁷ Va di khala lidzungu, va dhedhereka kha nga muthu nya guleve, ni wugengeli wawe wu si va phasi gilo.

²⁸ Gugaradzegani gwawe va di lila ga Pfhumu Nungungulu va lomba gu phaswa, uye a di va vbanyisa dzimhangoni gwawe.

²⁹ A di kawuka gingulu, higyo kape; ma vbwasama mavimbi, gu manega malenga.

³⁰ Avo va di tsaka khu gu wona linene gurula, va vbohiswa gwadi siwoni va gu vbwetago.

³¹ Rungudzani Pfhumu Nungungulu khu lihaladzo laye, khu mithumo nya gusamadzise a girelago vathu!

³² A na kulungedwe tshanganoni nya vathu, a na rungudzwe vbakari nya madhota.

³³ Nungungulu giride mitsongo yi khala giwula; ni sibuga nya mati si khala gihala.

³⁴ Wulime nya wadi a di wu vbindrugedza wu khala munyu, khu kotani nya wuvivbi wa avo va khalago umo.

³⁵ Giride giwula gi khala litsiva nya mati, ni mafu nya gubange a ma gira sibuga nya mati.

³⁶ A di vega umo vale va gu ni ndzala, va vbaha dzindranga dzawe va gu vbanya umo,

³⁷ va limide va yala misimbo nya mikandzu, va mana mihandro nya gutale.

³⁸ Nungungulu a di kategisa vathu vaye, avo va di velega sanana nya singi, wu di si vbungugi tengo nya sifuyo sawe.

³⁹ Aholu avo va di vbungudwa va khala vadugwana, khu gu vbwasamiswa, ni sigaradzo ni mabango.

⁴⁰ Nungungulu a di nyenya vatshanisi, a va dzimedza va legalega giwulani nyambana ndzila.

⁴¹ A na dusa sisiwana gusanisekani gwawe, a dandrisa dzingamo dzawe khwatshi mitshambi.

⁴² Vathu nya vadi va gu siwona, va na nengela khiso, aholu va nya guvivba va na hamuga nigyo nya guganele.

⁴³ Oyu a gengedego a ngu thela kota khu silo sesi, a pimisa gwadi lihaladzo la Pfhumu Nungungulu.