Dzindzimo 103 - Bhibhiliya Nya Guage

Ndzimo nya gubonge wuhigo wa Nungungulu

Ndzimo ya Dhavhidhe

¹ Uwe hefemulo wangu dhumisa Pfhumu Nungungulu, ni satshavbo si guromo ndrani gwangu, si na bonge lina laye li agidego.

² Uwe hefemulo wangu bonga Pfhumu Nungungulu, u nga divali ni moyo nya mithumo yaye nya yadi.

³ Khuye a gu tsetselelago siwono sago satshavbo; ni gu gu hawulugisa madwali yago yatshavbo.

⁴ Khuye a vbanyisago womi wago thowoni, a gu tadza khu wuhigo ni lihaladzo;

⁵ khuye a gu khurisago khu satshavbo nya sadi gasi gu wusedza wudzaha wago wu fanana ni owu nya lighama.

⁶ Pfhumu Nungungulu a ngu lamula khu nayo, a gu emela dzifanelo dza avo va saniswago.

⁷ Yeyedzide dzindzila dzaye ga Mosi ni mithumo yaye ga sanana sa Israyeli.

⁸ Pfhumu Nungungulu a na ni wuhigo ni wuwadi a ngu timisela na tade khu lihaladzo.

⁹ Kha hi tsayisi gikhati gyatshavbo, ni likhulo laye kha li simami kala gupindruga.

¹⁰ Kha hi tsayisi gupima khu sighoho sathu, gambe kha hi bweledzeli gukhedza khu guvivba gwathu.

¹¹ Kha nga idzo ndzadzini a gu hwindzo ni mafuni, kharati nilo lihaladzo laye likhongolo ga vale va mu ningago githawo.

¹² Kha nga idzo Khugadambo gu gu hwindzo ni Muhwadambo, kharato nugo a ngu ndreyisa vbakari gwathu sighoho sathu.

¹³ Kha nga babe a tsetselelago sanana saye, kharato nugo Pfhumu Nungungulu a ngu tsetselela vale va mu ningago githawo.

¹⁴ Kholu a ngu dziti edzi hi wumbidwego khidzo, a ngu alakanya gukhuye ethu hi libumba basi.

¹⁵ Matshigu nya guvbanye nya muthu ma gu fanana ni mwasi; wa gu dandra, wu rumbuga nga senge sa khabini.

¹⁶ Ya gu furugedza phuvbo sa gu wu na si mwalalega, si hongola wulanga nyamba tidwa.

¹⁷ Aholu, wuhindzi wa Pfhumu Nungungulu, wu ngu simama kala gupindruga ga vale va mu ningago githawo, gululama gwaye gu ngu wonega kala ga situgulwana sawe;

¹⁸ ga vale va sayisago gidzumeledzwano gyaye, va si divaligo gu landrisa milayo yaye.

¹⁹ Pfhumu Nungungulu tiyiside gikhalo nya wufumu Waye Ndzadzini, wufumu waye womo vbatshani nya silo satshavbo.

²⁰ Bongani Pfhumu Nungungulu enu dzingilozi dzaye, enu mu gu na ni tshivba mu landrisago milayo yaye ni gu yingisa magana yaye.

²¹ Bongani Pfhumu Nungungulu enu sivangwa saye satshavbo, enu sithumi saye ni gu gira gugola gwaye.

²² Bongani Pfhumu Nungungulu enu mithumo yaye yatshavbo, malangani yatshavbo ma guromo vbavbatshi nya wufumu waye! Uwe monyo wangu rungudza Pfhumu Nungungulu.