Dzindzimo 102 - Bhibhiliya Nya Guage

Gu dzi laya ni gutumba

Nombelo wa muthu a sanisekago ni gu vbela tshivba, a lilago mbeli ga Pfhumu Nungungulu

¹ Pfhumu Nungungulu, yingisa nombelo wangu, gulila gwangu gu na vbohe iyo gwago!

² U nga nyi siheli khovbe yago nya gu bani nyi romo sigaradzoni; neredza ndzeve yago u nyi yingisa; vbiredza gu nyi hakha gikhati nyi gu ranago.

³ Kholu matshigu yangu, ma gu mwalalega khwatshi wutshi, ni marambo yangu ma vbide gukhwatshi magala.

⁴ Monyo wangu wu hekhidwe wu banga kha nga mwasi; nya gu divala ni gu hodza.

⁵ Khu kotani nya gu dilele ngudzu, nyi wondride nyi tshala khu sikongolo.

⁶ Nya gu fanana ni lisekwa la giwulani, nyi fanana ni lipfhuguli la marumbini.

⁷ Wutshigu watshavbo kha nyi mani ligovbe, gukhwatshi nyi ginyoni nyi tshidwego ni wutundzu, vbatshani nya nyumba.

⁸ Gikhati gyatshavbo nya gu vadwa khu valala vangu, avo va nyi vengago va gu nyi yuyutela khu lina langu.

⁹ Wulangani nya gibaba, nya gu hodza nguma ni gusela gwangu gwa gu patana ni marongo yangu,

¹⁰ khu kotani nya gu goroge ni likhulo lago, kholu u di nyi khusa u nyi rinya hwindzo.

¹¹ Matshigu yangu ma gu mwalalega gu fanana ni mutsa nya silambo, ma gu wu na ma banga gu fanana ni mwasi.

¹² Aholu, uwe Pfhumu Nungungulu, u ngu fuma kala gupindruga, lina lago li na alakanywa khu mimela ni mimelana.

¹³ U na khuga u ema u girela wuhindzi Siyoni, gikhati nya gu u mupwela gisiro, khigyo egi gikhati gi emisedwego.

¹⁴ Kholu, sithumi sago si ngu gola siwindri sa Siyoni, ni gupwa wuvi khu kotani nya marumbi yawe.

¹⁵ Mahundzu yatshavbo ya mafuni, ma na rungudza lina la Pfhumu Nungungulu, ni vafumeli vatshavbo va mafuni va na dhumisa wugulu waye.

¹⁶ Kholu Pfhumu Nungungulu a na vbahedza nyaluphye Siyoni a dzi wonegisa khu wudhumo waye.

¹⁷ A na yingisa nombelo nya khulungu kha na nga nyenya nombelo waye.

¹⁸ Satshavbo sesi si na lovedwe situgulwana si nga gutago, gasi vathu va na velegwago hwane va dhumisa Pfhumu Nungungulu.

¹⁹ Pfhumu Nungungulu khedzide vbavbatshi nari khu giluveloni gwaye nya guage, wonide litigo nari khu ndzadzini,

²⁰ gasi gupwa gudilela ga vale va khothedwego, ni gu tshula ava va konedwego gu songwa;

²¹ gasi gu tiviswa Siyoni lina la Pfhumu Nungungulu, va huwelela wudhumo waye dhoropani ga Jerusalema;

²² gasi avbo va na tshanganago vathu nya mayigo, ni mifumo va khozela Pfhumu Nungungulu.

²³ Uye a nyi vbedzide tshivba vbakari nya ndzila, a rodzisa matshigu yangu nya guvbanye.

²⁴ Nyi di ganela, kheni: “Nungungulu wangu, u nga nyi dzegi na nyi ngari vbakari nya matshigu nya guvbanye.” Myaga yago yi thaphelago mimela ni mimelana.

²⁵ U tiyiside mafu gukhugela guhegulani; ni ndzadzini i thumo nya mandza yago.

²⁶ Satshavbo si na vbindra, aholu uwe u na simama u tiya; satshavbo si na hagala kha nga dzingandzu, u na si tshiphisa kha nga guambala, iso si na mwalalega.

²⁷ Aholu uwe khuwe kamwe wa moyo, myaga yago yi mwalo mahegiso.

²⁸ Sanana sa vathu vago, si na vbanya na si tiyide, ni situgulwana sawe si na tiyiswa mbeli gwago.