Dhewuteronome 9 - Bhibhiliya Nya Guage

Mosi a ngu alakanyisa va na Israyeli giphaso gya Nungungulu

¹ Upwa uwe Israyeli, muhuno u na tshatuga tsongo wa Joridhani gasi guya khozisa mifumo nya yikhongolo yi gu ni tshivba gu gu vbindra; madhoropa nya makhongolo ni mabhiyo nya gulaphe kala damboni;

² Vathu vaye nya gulaphe nya sidandrangulu, sanana sa Anaki, avo u vatigo gambe u pwidego na gu ganedwa, khavo pwani: Khu mani a va tiyelago va na Anaki?

³ Muhuno olu, dziti gukhuwe Pfhumu Nungungulu wago, khuye a na thangago mbeli gwago; gufana ni nilo wu vbisago, a na va mbembisa ni gu va fuvisa mbeli gwago; khu guralo, uwe u na va bhobha, u va phalalegisa, u va fuvisa khu givbiredza, kha nga a gu embedego Pfhumu Nungungulu.

⁴ Avbo Pfhumu Nungungulu wago, a na va tutumisago mbeli gwago, u nga ganeli khu monyoni gwago, khuwe: Kota nya gululame gwangu Pfhumu Nungungulu a nyi residego tigoni momu gasi nyita li fumela, kholu, Pfhumu Nungungulu a gu tutumisa vathu vava khu kotani nya guvivbe nya myonyo yawe.

⁵ Khandri khu kotani nya gululame gwago, gambe khandri khu kotani nya wuwadi nya monyo wago u na belago u fumela litigo lawe, aholu khu kotani nya wuvivbi wa mayigo yaya Pfhumu Nungungulu wago, a ma tutumisago mbeli gwago; gasi gu tiyisa magana Pfhumu Nungungulu wago, a sambanyidego ga vababe vago, Abrahama, Isaki ni Jakobe.

Gumba tumbega ga Israyeli

⁶ Khu guralo, dziti nya gukhuwe khandri khu kotani nya gululame gwago, Pfhumu Nungungulu wago a gu ningago litigo leli nya ladi gasi gu u li fumela, kholu uwe u muthu nya gubange hungo.

⁷ Alakanyani, gambe mu nga divalini gukhenu mu goroside Pfhumu Nungungulu wanu, giwulani; gukhugela litshigu mu dugidego khu tigoni ga Egipito kala mu vboha ga wulanga wowu, mu di wugela Pfhumu Nungungulu;

⁸ ambari gigomoni ga Horebhi mu gorogiside Pfhumu Nungungulu, likhulo la Pfhumu Nungungulu li di khondra gasi gu mi mbembisa.

Gidzumeledzwano gya Horebhi

⁹ Na nyi gu lita gigomoni gasi guya hakha sileti nya giwindri, sileti nya gidzumeledzwano Pfhumu Nungungulu a giridego nanu, nyi khade gigomoni magumana matshigu, wutshigu ni mihani; nyamba hodza gilo, ni gumba sela mati.

¹⁰ Pfhumu Nungungulu a di nyi ninga sileti sivili nya giwindri, na si lovidwe khu nyala ya Nungungulu; ga iso, gu di lovidwe magana yatshavbo, aya Pfhumu Nungungulu a nga ganelago gwanu gigomoni, nari vbakari nya nilo, na gu tshanganide vathu vatshavbo.

¹¹ Guvbelani nya magumana matshigu, wutshigu ni mihani, Pfhumu Nungungulu a di nyi ninga sileti sivili nya giwindri, sileti nya gidzumeledzwano.

¹² Khavbo avbo, Pfhumu Nungungulu a di nyi embela, khuye: Khuga, u relela khu guvbiredza, kholu vathu vago, u va dusidego tigoni ga Egipito, olu va giride guvivba; va vbiredzide gu diga ndzila eyi nyi nga va leletelago; va dzi girede gifananiso nya dzisimbi nya gunyiviligiswe.

¹³ Pfhumu Nungungulu a di ganela gambe a nyi embela, khuye: Nyi lingedzede vathu vava, nyi wonide gukheni vathu nya gubange mihungo.

¹⁴ “Nyi dige nyi va mbembisa, nyi futa lina lawe mafuni; nyi na wusa khavbo gwago litigo nya tshivba ni vathu nya gutale ngudzu guvbindra ava.”

Gimombyana nya ndralama

¹⁵ Khu guralo, nyi di thendregedza nyi tshiga khu mugigomoni; ni gigomo gi di gu khondra khu nilo; sileti sa sivili nya gidzumeledzwano si di romo mandzani gwangu.

¹⁶ Nyi di khedza, nyi wona gukheni mu ghohede Pfhumu Nungungulu wanu; khu gu dzi girelani gimombyana nya dzisimbi nya gunyiviligiswe; mu di vbiredzani gu diga ndzila eyi Pfhumu Nungungulu a mi rumidego.

¹⁷ Khavbo avbo, nyi di dzega sileti sa sivili nyi si digeledza mandzani gwangu si pandrega na mu gu nyi wona.

¹⁸ Nyi diya dzi thesa gambe mbeli ga Pfhumu Nungungulu, nga gikhati nya guhegule, nyi vbedza magumana matshigu, wutshigu ni mihani, nyamba hodza guhodza, nyamba sela mati, khu kotani nya sighoho sanu mu si giridego mahoni ga Pfhumu Nungungulu, mu gira silo nya gunyenyeze.

¹⁹ Khu guralo, nyi di gu thava khu kotani nya likhulo ni khorodza eyi Pfhumu Nungungulu a nga bani a mi gorogede gu kala a vbweta gu mu mbembisa; ambari khu guralo, Pfhumu Nungungulu a di engedza, a nyipwa gambe ga gikhati gegi.

²⁰ Pfhumu Nungungulu a di gorogela ngudzu Aroni a vbweta gu mu songa; aholu nyi di lombelela gambe khu Aroni ga gikhati gya gimwegyo.

²¹ Khu guralo nyi di dzega gighoho gyanu, a gu gimombyana mu nga bani mu giride, nyi gi vbisa niloni, nyi gi phwatisela, nyi gi kuya gwadi, kala gi khala wuguvbi; wuguvbi wakone nyi di wu rinya gitsongwanani gi nga bani gi relela khu gigomotunu.

²² Gambe mu goroside Pfhumu Nungungulu na muri Tabhera, Masa ni Kibroti-Hatahava.

²³ Gikhati Pfhumu Nungungulu a mi rumedego gambe Kadhesi-Bharineya, a mi embela, khuye: Gwelani mu ya dzega litigo nyi mi ningidego, enu mu di yeyisa guruma ga Pfhumu Nungungulu wanu, kha mwa khodwa, gambe kha mwa yingisa lito laye.

²⁴ Enu mu va gu kanyisa Pfhumu Nungungulu, gukhugela litshigu nyi phedego gu mitini.

Mosi a ngu lombelela khu vathu

²⁵ Khu guralo, nyi di khidzima mbeli ga Pfhumu Nungungulu, nyi dzi vega vbavbatshi magumana matshigu, wutshigu ni mihani kholu, Pfhumu Nungungulu a di nyi embede gukhuye a ngu vbweta gu mi mbembisa.

²⁶ Nyi di lombelela ga Pfhumu Nungungulu, nyi ganela, kheni: Ama Pfhumu Nungungulu! U nga mbembisi vathu vago, a gu thomba yago gambe, U va dzegisidego khu wugulu wago, U va dusidego khu tigoni ga Egipito khu mandza yago nya tshivba.

²⁷ Alakanya sithumi sago Abrahama, Isaki ni Jakobe; U nga woni gubanga nya myonyo ya vathu vava, ambari guvivba gwawe, ni sighoho sawe,

²⁸ gasi vathu va tigoni mule U hi dusidego khumo va si ganeli, khavo: Pfhumu Nungungulu tandregide gu va bedza tigoni mule a nga va tumbisago, kholu a va duside omu khu gu va venga gasi guya va songa mugiwulani.

²⁹ “Khu guralo, khavo vathu vago ni thomba yago, u va dusidego wugumbini khu tshivba yago nya yikhongolo ni libogo lago nya wundrena.”