Dhewuteronome 7 - Bhibhiliya Nya Guage

Milayo yi gimbilelanago ni gumba tumbega

¹ Gikhati Pfhumu Nungungulu wago a na gu vbohisago ga litigo uyago umo gasi guya li fumela, avbo a na gu bani a tutumiside mbeli gwago, a va yisa hwindzo, vathu nya mafumbu nya gutale: Vahiti, Vagerazi, Vaamori, Vakhanani, Vaferezi, Vahevhi ni Vajebhuzi, livbandre na mavili mayigo ma gu na ni vathu nya vangi ni tshivba guvbindra uwe;

² avbo Pfhumu Nungungulu wago, a na va ningelago mandzani gwago u va khozisa, u na va mbembisela muphelo. U nga giri navo pwanano, ambari gu va pwela gisiro.

³ U nga dzegani ni vathu nya mayigo yoyo; u nga lowodzisi sanana sago nya sagadzyana ambari gu lowodza vanyamahegyane vawe ga sanana sago nya sikhwathana;

⁴ kholu avo va ngata ndreyisa ndzilani gwangu sanana sago, siya khozela vambe vanungungulu. Wa gu gira isoso, mu na wugedwa khu likhulo la Pfhumu Nungungulu, mu dzegela gumbembiswa khu guvbiredza.

⁵ Vathu vovo, mu fanede gu va gira esi: Mu na khungumula siluvelo sawe, mu pandrelela ni siwindri nya wukhozeli, mu kokelela madingo yawe ni guvbisa sithombe sawe nya guvatwe.

⁶ Kholu enu mu vathu va agisedwego Pfhumu Nungungulu wago. Pfhumu Nungungulu wago, a mi hathide gasi mu khala vathu vaye, vbakari nya mafumbu yatshavbo ma guromo mafuni.

⁷ Pfhumu Nungungulu a mi gode, khandri a di mi hatha khu gu mi wona muri vangi guvbindra mambe mafumbu ya mafuni, kholu enu mu diri vadugwana ga mafumbu yatshavbo.

⁸ Aholu Pfhumu Nungungulu a di gira esi khu gu mi gola, ni gu vbweta gu tadzisa gisambanyo a giridego ni vababe vanu, Pfhumu Nungungulu a mi dusideni khu libogo nya tshivba, a gu mi tshudzisa nyumbani nya wugumbi, mandzani ga Faro, mufumeli wa Egipito.

⁹ Khala nu gu dziti nya gukhuwe Pfhumu Nungungulu wago, Nungungulu nya gutumbege, a vegedzago gidzumeledzwano ni gu girela wuhindzi kala gitugulwana nya likhumi mazana (1.000), ga vale va mu golago ni gu landrisa milayo yaye;

¹⁰ aholu, a gu bweledzela vale va mu vengago, khu gu va tsayisa a va mbembisa; avo va mu vengago, kha hweli gu va bweledzela.

¹¹ Khu guralo, vegisa sirumo, sileletelo ni milayo, esi muhuno nyi gu rumago gu si landrisa.

Sikategiso si girwago khu guyingisa

¹² Khu guralo, wa gu yingisa milayo yeyi, u yi vegedza ni gu yi landrisa, Pfhumu Nungungulu wago, a na sayisa gidzumeledzwano ni wuhindzi a tumbisidego khu gusambanya ga vababe vago.

¹³ Uye a na gu gola ni gu gu kategisa, a na gira melego wago wu andra; gambe a na kategisa sanana sago, ni mihandro ya tigoni gwago, dzimbewu dzago gumogo ni vbinyu yago; mafura yago, gumogo ni guvelegelana nya mitshambi yago nya dzimombe ni ya dzinvuta dzago, ga litigo eli, Pfhumu Nungungulu, khu gusambanya ga vababe vago a tumbisidego gu gu ninga.

¹⁴ U na bani u kategide ngudzu guvbindra mayigo yatshavbo; kha gu na manega vbakari gwago mwama mwendro nyamayi nya gifule, ambari vbakari nya sifuyo sago.

¹⁵ Pfhumu Nungungulu a na dusa gwago mabango yatshavbo; khu na nga bayiswa khu madwali ni mitungu nya guthise nya nga yile ya tigoni ga Vagipiti, u yitidego gwadi; gambe a na tsayisa khiyo vatshavbo vale va gu zondrago.

¹⁶ U na mbembisa vathu vatshavbo avo Pfhumu Nungungulu wago, a na gu ningago; maho yago kha ma na va pwela wusiwana, gambe khu na khozela vanungungulu vawe, kholu isoso si nga tshukha si khala milaphwi gwago.

¹⁷ Wa gu ganela khu monyoni gwago, khuwe: Vathu nya mayigo yaya vangi ngudzu gu nyi vbindra; nyi na dzi kodza kharini gu va pala, nyi va tutumisa?

¹⁸ U nga va thavi. Dundruga esi Pfhumu Nungungulu wago, a giridego ga Faro gumogo ni Vagipiti vatshavbo:

¹⁹ Siwonegiso nya sikhongolo u si wonidego khu maho yago, ni siyeyedzo, siliwugiso, mandza nya tshivba ni libogo li khusedzidwego, esi Pfhumu Nungungulu wago, a gu dusidego khiso. A na gira kharato Pfhumu Nungungulu wago, ga vathu vatshavbo, avo u va thavago.

²⁰ Gu diga nya isoso, Pfhumu Nungungulu wago, a na rumela vbakari gwawe dzimifi, kala va mbemba vatshavbo, ni vale va nga bani va tshade, va nga gu sihalelago.

²¹ U nga khali hwanga mbeli gwawe, kholu Pfhumu Nungungulu wago, a gu Nungungulu nya khongolo ni guthavisega, womo vbakari gwago.

²² Pfhumu Nungungulu wago, a na ndreyisa hwindzo vbadugwana vbadugwana, mayigo yaya, mbeli gwago; khu na va mbembisa vatshavbo va vbela khu gumogo, kholu sirengo sa khabini si nga velegelana si gu wugela.

²³ Aholu Pfhumu Nungungulu wago, a na va ningela mandzani gwago, a na wusa pfilupfilu nya yikhongolo vbakari gwawe, kala va gumbembiswa.

²⁴ A na ningela gambe mandzani gwago vafumeli vawe, gasi uwe u fuvise malina yawe mafuni; mwalo ni moyo a na tiyago gu ema mbeli gwago, kala u va mbembisa.

²⁵ U na vbisa khu nilo sifananiso nya guvatwe nya vanungungulu vawe; parata gumogo ni ndralama yi guromo gwawe, u nga yi dogoreli, gambe u nga yi dzegi, gasi u si thegeli naphwini; kholu si nyenyezide ga Pfhumu Nungungulu wago.

²⁶ “Khu guralo, u nga bedzi gilo nya gunyenyeze nyumbani gwago, gasi u si vadwi kha nga igyo; satshavbo u fanede gu si nyenya, kholu si vadwe.”