Dhewuteronome 15 - Bhibhiliya Nya Guage

Mwaga nya gudivaledwe mangava

¹ “Guvbelani nya mwaga ni mwaga nya livbandre na mivili, u na tsetselela mangava.

² Khu guralo, matsetselelo yakone nya mangava, khaya: Muthu watshavbo a na gu bani a fuyariside gilo ga muakelane mwendro ndriyaye a nga mu henguli esi a mu fuyarisidego; kholu mwaga nya guhuweledwe gutsetselela ga Pfhumu Nungungulu.

³ Ga muthu wa vbavbandze u ngu kodza gu mu hengula, aholu iso si guromo mandzani ga ndriyago si dige;

⁴ gasi gu si manegi gisiwana vbakari gwago; Pfhumu Nungungulu wago, a na gu kategisa u andra tigoni a na gu ningago, gasi gu khala thomba yago, u li fumela,

⁵ wa gu yingisa basi lito la Pfhumu Nungungulu wago, gasi gu dzi garadza khu gu landrisa milayo yeyi yatshavbo nyi gu leletelago muhuno.

⁶ Pfhumu Nungungulu wago, a na gu kategisa, kha nga edzi a gu embedego khidzo; khu kharati, u na fuyarisa mayigo nya mangi, aholu uwe khu na fiyari; gambe u na fumela mayigo nya mangi, aholu, ayo kha ma na nga gu fumela.”

Milayo nya guemele sisiwana

⁷ Vbakari gwago gwa gu tshukha gumanega moyo nya gisiwana wa na gyanu, ga limwedo nya madhoropa yago, tigoni mule Pfhumu Nungungulu wago, a gu ningago, u nga bangisi monyo wago, gambe u nga fumbaredzi mandza yago ga ndriyago nya gisiwana;

⁸ aholu mu pwele wusiwana u thawuludza mandza u mu fuyarisa iso si mu kenelelago, gasi a thumisa esi a si vbwetago.

⁹ Dzi wonele, gu nga manegi mapimo nya guvivbe monyoni gwago, ambari gu ganela, khuwe: Womo vbafuvbi mwaga nya livbandre na wuvili, a gu mwaga nya tsetselelo, maho yago ma manega na ma gu vala ndriyago nya gisiwana, u si mu ningi gilo. Uye a gu lila khu uwe ga Pfhumu Nungungulu, u na manega nuri ni gighoho.

¹⁰ Mu ninge nu tshulegide, monyo wago wu nga kanakani gikhati u mu ningago; khu isoso, Pfhumu Nungungulu wago, a na gu kategisa ga mithumo yago yatshavbo, gumogo ni ga satshavbo u na si girago.

¹¹ Khu guralo, gima kha gu na hamugega sisiwana tigoni gwago; khu kotani nya isoso, nyi ngu gu leletela, kheni: Thawuludza mandza yago nu tshulegide u ninga ndriyago, ni muhamugi, ni gisiwana gi guromo tigoni gwago.

Milayo mayelano ni sithumi

¹² Wa gu rengisedwa moyo nya vandriyago nya Muhebheru, nya mwama mwendro nya nyamayi a na gu thumela livbandre na moyo myaga, khu oyu nya livbandre na mivili u na mu tshula a hongola.

¹³ Gikhati u na mu tshulago, u nga mu digi a hongola nyambana gilo mandzani gwaye.

¹⁴ Mu ninge sifuyo sago na wu tshulegide, dzimbewu dza githalani gwago gumogo ni wadwa wa gikhwatini gwago; u na mu bagedza dzithomba nya esi Pfhumu Nungungulu wago, a gu kategisidego khidzo.

¹⁵ Alakanya gukhuwe u khade khumbi tigoni ga Egipito, umo Pfhumu Nungungulu wago, a gu dzegisidego; khu kharato, muhuno nyi ngu gu ninga nayo yoyu.

¹⁶ Aholu a gu gu embela, khuye: Kha nyi vbweti gu khuga avbo gwago, kholu a manago gu sayisega gwadi avbo gwago ni gu uwe u mu wona nari ni mapimo,

¹⁷ avbovbo, uwe u na mu emisa vbamwanyatunu, u dzega ndrombo u mu pola ndzeve, khu guralo, uye a na khala wago kala gupindruga. U na gira gambe kharato ga githumi gyago nya nyamayi.

¹⁸ Wa gu mu tshula, u nga vbisegi khu gu mu wona na gu hongola; kholu uye a gu thumede livbandre na moyo myaga, a gu bhindzulede tanga nya gipandre nya esi u nga hadza gu livba githumi nya gu gi thole; khu guralo, Pfhumu Nungungulu wago, a na gu kategisa ga satshavbo u na girago.

Milayo mayelano khu matiwula nya sifuyo

¹⁹ Matiwula yatshavbo ma na gu velegwago tshambini gwago nya dzimombe mwendro nya dzinvuta, ayo nya matune, u na phasela Pfhumu Nungungulu wago; matiwula ya phandroni gwago nya dzimombe, u nga tshuki u ma thumisa, ambari matiwula nya dzinvuta dzago u nga ma gayi mawoya.

²⁰ Khu mwaga ni mwaga, u na ya ma hodza mbeli ga Pfhumu Nungungulu, uwe gumogo ni lipango lago, wulanga wu na hathwago khu Pfhumu Nungungulu.

²¹ Aholu ma gu bani ma haside, gu ndzodola mwendro nari gikhumu, mwendro khu wumbe wulima nya wukhongolo, u nga si phaseli Pfhumu Nungungulu wago.

²² U ngu dzi kodza gu si songa u hodza gaya gwago; va ngu dzi kodza gu hodza vatshavbo avo va lulamidego ni avo va nyenyezidego, kha nga idzo va hodzago khidzo yisya mwendro tshesi.

²³ Vbavbandze basi nya novba wakone, mu nga hodzi, u na wu vbaladza mafuni kha nga mati.