Dhaniyeli 4 - Bhibhiliya Nya Guage

Wupumbu wa Nabhukodhonosori

¹ Mufumeli Nabhukodhonosori, a di rumela ga mayigo yatshavbo, mafumbu ni vathu nya malimi yatshavbo va vbanyago mafuni gwatshavbo, gukhuye: Gurula gu na khale nenu!

² Nyi di wona na si lulamide gu yeyedza siwonegiso ni siliwugiso Nungungulu a khusegidego ngudzu, a si giridego avbo gwangu.

³ Idzo si gu sikhongolo khidzo siwoniso saye, nidzo si gu ni tshivba khidzo! Mufumo waye khwa gu kala gupindruga, gufuma gwaye gwa gu thaphela mimela ni mimelana.

⁴ Eni mufumeli Nabhukodhonosori, na nyiri nyumbani gwangu nya wufumu ya gitezi, na nyi khade nyi tangala.

⁵ Na nyiri ligovbeni, nyi lora ndroro yi nga nyi thavisago, hungo wangu wu di hambanega mapimo khu kotani nya siwoniso nyi nga si wonago.

⁶ Nyi di vega nayo nya guranise vagengeli vatshavbo va Bhabhiloni, gasi guta nyi ninga tshamuselo nya ndroro nyi nga lorago.

⁷ Khavbo avbo, gu dita dzinyanga, va nya sikwembu, Vakalidhiya ni valoli nya dzisolo, nyita va tivisa ndroro yangu, aholu avo kha va kodza gu nyi ninga tshamuselo yaye.

⁸ Khu guhegisa, gu dita mbeli gwangu Dhaniyeli, uye a tidwago khu lina la Bhalitazari, a gu lina nya nungungulu wangu, uye li vbanyago gwaye liphuvbo la vanungungulu va agidego, eni nyi di mu embela ndroro yangu kheni:

⁹ Bhalitazari, muthangeli nya vagengeli, nyi ngu dziti gukheni avbo gwago lomo liphuvbo la vanungungulu va agidego, mwalo sihalo u tandrwago khuwo. Nga nyi embela siwoniso nyi si wonego ndroroni gwangu ni gu nyi ninga tshamuselo yaye.

¹⁰ Siwoniso nyi nga si wonago na nyi lade dawuni gwangu khesi: Nyi di wona mbeli gwangu simbo nya gulaphe ngudzu nari vbakari nya mafu.

¹¹ Simbo yoyu wu di dandra ngudzu wu mana tshivba, wu lapha kala damboni; wu wonwa tigoni gwatshavbo.

¹² Mahagane yaye ma di mburide, na wuri ni mihandro nya yingi, vathu vatshavbo va di mana umomo guhodza; sirengo nya likhabi si di zumba mutsani gwaye, ni sinyoni sa damboni si di vbaha umomo sihaga sawe, sivangwa satshavbo nya guvbanye si di hodziswa khuwo.

¹³ Umo nya siwoniso sangu na nyi lade dawuni gwangu, nyi di wona moyo nya muwoneleli, ngilozi, nya guage na yi relela khu ndzadzini,

¹⁴ na yi gu laledza khu tshivba, khiyo: Sigulani simbo, wu pileni matamo, mu kutsunga mahagane yaye, mu phalalegisa mihandro yaye. Tutumisani sirengo si khadego vbavbatshi gwaye ni sinyoni si vbahidego matamoni gwaye.

¹⁵ Tshina ni mikhamba yaye, si digeni mafuni, yi hungeni khu makhetshe nya simbi ni sugu mwasini wa khabini, wu naganiswa khu hunguva ya ndzadzini, wu na kavedwe gumogo ni sirengo mwasi wa khabini.

¹⁶ Monyo waye wu na vbindrugedzwe wu si khali gambe monyo nya muthu, aholu a ningwa monyo nya girengo, kala guvbindra livbandre na sivili sikhati.

¹⁷ Gulamula gogu, gu di tiviswa khu dzingilozi, nayo wu leletedwa khu va nya guaga. Gasi avo va vbanyago va dziti gukhavo uye a Khusegidego ngudzu a ngu fuma mifumo yatshavbo nya vathu ni gu ninga ni wevbini a mu golago ambari nari wa gu solega guvbindra vatshavbo, a ngu mu emisa vbakari gwawe.

¹⁸ Eyi khiyo ndroro nyi loridego eni mufumeli Nabhukodhonosori. “Olu uwe Bhalitazari, nyi ninge tshamuselo yaye, kholu vagengeli vatshavbo va tigoni gwangu, kha va dzi khodza gu nyi tshamusela. Gambe uwe, u ngu dzi kodza, kholu liphuvbo la vanungungulu va agidego lomo vbatshani gwago.”

Dhaniyeli a ngu Tshamusela ndroro

¹⁹ Khavbo avbo, Dhaniyeli, a nga bani na gu ranwa khu lina la Bhalitazari, a di huye kape gikhati nya gulaphe, na gu thava khu maalakanyoni gwaye. Khavbo avbo, mufumeli a di mu embela, khuye: “Bhalitazari, u nga thurugiswi khu kotani nya ndroro ni tshamuselo yaye.” Bhalitazari a di mu hakha, khuye: Mune wangu, ndroro yeyi yi na thonone avo va gu zondrago, ni tshamuselo waye wu na thonone valala vago!

²⁰ Simbo u nga wu wonago, wu dandra wu mana tshivba, wu lapha kala damboni, wu nga wonwago tigoni gwatshavbo,

²¹ na wuri ni mahagane nya wumburi, ni mihandro nya yingi, na wuri ni guhodza nya gu enedze vathu vatshavbo, sirengo sa khabini si nga bani si zumba mutsani gwaye, sinyoni sa damboni si vbaha sihaga matamoni gwaye,

²² simbo wowo, gu thudwa uwe mufumeli, u dandridego u khala muthu nya tshivba, wugulu wago wu vboha kala damboni, gufuma gwago gu nava kala mahegiso nya litigo.

²³ Gasi esi uwe mufumeli, u wonidego muwoneleli, ngilozi nya guage yi nga relela khu ndzadzini, khiyo: Pilani simbo, mu wu mbembisa, aholu tshina ni mikhamba yaye, si digeni mafuni, mu yi hunga khu makhetshe nya simbi ni sugu, mwasini wa khabini, si naganiswa khu hunguva ya ndzadzini, a kavedwa gumogo ni sirengo sa khabini, kala guvbindra livbandre na sivili sikhati,

²⁴ owu khuwo tshamuselo wago uwe mufumeli, ni nayo wa oyu a Khusegidego ngudzu, wu na gutago avbo ga mufumeli mune wangu.

²⁵ Uwe u na lundrwa vbakari nya vathu, uya vbanya vbakari nya sirengo sa khabini, u hodza mwasi nga dzimombe, u wedwa khu hunguva ya ndzadzini. Gu na vbindra livbandre na sivili sikhati, kala u dziti nya gukhuwe uye a Khusegidego ngudzu, a ngu fuma vbakari nya mifumo nya vathu, ni gu dzega wufumu a ninga uye a mu golago.

²⁶ Sileletelo nya gudige tshina nya simbo ni mikhamba yaye, mufumo wago u na bweledzedwa khu hwane nya gu bani na wu gu dzitide nya gukhuwe uye a guromo vbatshani ngudzu, a ngu fuma.

²⁷ Khu guralo, uwe mufumeli, dzumela gulaya gwangu, u diga sighoho ni guvivba gwago u gira gululama, u pwela wuhindzi sisiwana, a gu dzina saye matshigu yago nya gu tsake ma na simama.

²⁸ Silo sesi satshavbo si dugelede ga mufumeli Nabhukodhonosori.

²⁹ Hwane nya likhumi na mivili migima, avbo mufumeli wa Bhabhiloni, a nga bani na gu gimbilagimbila vbatshani nya gitezi nya nyumba nya wufumu,

³⁰ mufumeli a di ganela, khuye: “Khandrilo eli lidhoropa nya likhongolo la Bhabhiloni nyi li vbahidego khu tshivba yangu gu khala tsindza nya gu dhumiswe wugulu wangu gani?”

³¹ Avbo mufumeli a nga bani nasi vbedzi gu ganela, gu di pwala lito khu ndzadzini, khilo: Mufumeli Nabhukodhonosori, mufumo wago wu dusidwe.

³² Uwe u na lundrwa vbakari nya vathu, u ya vbanya gumogo ni sirengo sa khabini, u na hodza mwasi nga sirengo sa khabini gipimo nya livbandre na sivili sikhati, kala u pima nya gukhuwe uye a Khusegidego ngudzu, a ngu fuma mifumo nya vathu ni gu wu dzega a ningela uye a mu golago.

³³ Khu gikhati gyogyo, gu di tadzisega magana ga Nabhukodhonosori, a di lundrwa vbakari nya vathu a ya hodza mwasi nga dzimombe ni gu naganiswa khu hunguva ya ndzadzini, kala ndzudzu waye wu dandra nga mitenga nya lighama, samba saye si lapha, si fanana ni sa sinyoni.

³⁴ Aholu, khu hwane nya matshigu yoyo, eni Nabhukodhonosori, nyi di khusa maho nyi khedza ndzadzini, mapimo yangu ma di bwelo khavbo ma wuya, nyi bonga Uye a Khusegidego ngudzu, nyi rungudza ni gu dhumisa uye a vbanyago kala gupindruga, uye mufumo waye wu si vbeligo, wu thaphelago ga mimela ni mimelana.

³⁵ Vatshavbo va vbanyago mafuni, khandri gilo mbeli gwaye. Uye a gu thuma iso a si golago, khu mabutho nya dzingilozi dza ndzadzini ni vathu va vbanyago mafuni. Mwalo a ndreyisago gyandza gyaye mwendro gu mu embela, khuye: “Ginani u girago?”

³⁶ Khu gikhati gyogyo, ma di wuya mapimo yangu, nyi bwelo khavbo nyi mana wuzundzo, wugulu ni wudhumo nya mufumo wangu, nyita dzegwa khu dzindruna ni vathangeli vangu, nyi bweledzedwa mufumo wangu, nyi engedzedwa wudhumo guvbindra guhegulani.

³⁷ Gasi olu, eni Nabhukodhonosori, nyi ngu rungudza, nyi khusedza ni gu dhumisa Mufumeli nya dzindzadzi. Kholu mithumo yaye yatshavbo khya lisine, ni dzindzila dzaye dzi lulamide. Uye a na ni tshivba nya guthese vbavbatshi avo va dzi khusedzago.