Dhaniyeli 11 - Bhibhiliya Nya Guage

Vafumeli va Marandzi ni va Wuronga

¹ Gasi eni, nyi di khuga nyi mu tiyisela khu mwaga nya guhegule nya gufume ga Dhariyo, Mumedhi.

² Gasi olu, nya gu vbweta gu gu pwadzela lisine a gu eli: Gu nga na gu dugelela vafumeli vararu tigoni ga Perisiya, khu guhegisa a nata mufumeli nya wu na, a na gu fumago ngudzu dzithomba guvbindra vatshavbo. Avbo a na gu dzipwago na tiyide ngudzu khu kotani nya dzithomba dzaye, a na kutsedzela mayigo yatshavbo gu dwana ni mufumo wa Gerekiya.

³ Khu hwane, gu na dugelela mufumeli nya tshivba, a na gu fumago khu tshivba nya yikhongolo, a gira ni sevbi a si golago.

⁴ Gambe avbo a na gu dzipwago na tiyide gwadi, mufumo waye wu na pfhungumudwa wu kabaniswa khu sipandre sina sa ndzadzini. Kha wu na thaphela ga situgulwana saye, ni mufumo wakone kha wu na nga mana tshivba nga guhegulani, kholu wu na sigudwa wu ningedwa vambe.

⁵ Mufumeli wa Marandzi khuye a na manago tshivba, gambe moyo nya dzindruna dzaye, a na manega ni tshivba guvbindra uye, yi na fumela ni mufumo waye khu tshivba nya yikhongolo.

⁶ Aholu khu hwane nya myaga, va na bwelo va pwanana, nyamahegyane wa mufumeli wa Marandzi a nata dzegana ni mufumeli wa Wuronga, gasi va kodze gu gira gidzumeledzwano. Aholu kha na tiyisa tshivba nya libogo laye, ni livelego laye kha li na nga vbanya matshigu nya gulaphe. Kholu khu matshigu yoyo, uye a na ningedwa gasi a songwa, ni vatshavbo va nyumbani gumogo ni babe waye, ni vatshavbo va nga mu seketelago khu gikhati gyogyo.

⁷ Aholu, moyo nya lihundzu lawe, a na emiswa gu khala mufumeli wulangani gwaye. Uye a na duga ni masotshwa yaye, a bela makhokholani ga mufumeli wa Wuronga, a va sasela a va pala.

⁸ A na phanga gambe ni vanungungulu vaye, ni mwandra nya sifananiso saye, ni sombo saye nya lisima nya parata ni ndralama, a va vbagela a va yisa Egipito. Khu hwane nya myaga nya gukari, uye kha na nga dhumela mufumeli wa Wuronga.

⁹ Mufumeli wa Wuronga a na zama gu sasela mufumo wa mufumeli wa Marandzi, aholu uye a na vbiredzela gu bwelela tigoni gwaye.

¹⁰ Sanana saye si na tombana va gira gikwata nya gikhongolo nya masotshwa; va wusa nyimbi, moyo wawe a na tsemakanya vbingano nga ndrambi nya mati, bwelo khavbo a wuya ata sasela makhokhola ya mufumeli wa Marandzi.

¹¹ Khu guralo, mufumeli wa Marandzi a na duga na tade khu giviti, guya dwana ni mufumeli wa Wuronga, ambari a na gu bani nari ni gikwata nya gingi nya masotshwa, aholu va na ningedwa mandzani gwaye.

¹² Avbo a na gu wonago gupala gogu, mufumeli wa Marandzi a na tala khu gutsaka ngudzu monyoni gwaye, aholu ambari a gu songa mazanazana nya vathu, kha na ngaya mbeli khu gu dugelela.

¹³ Kholu, mufumeli wa Wuronga a na wuya ni gikwata nya gingi nya masotshwa guvbindra igyo nya guhegule, hwane nya myaga nya gukari, a na wuya nari ni gidzemo nya gingi nya masotshwa ma somidego gwadi, ata va sasela.

¹⁴ Khu matshigu yoyo, nya vangi va na wugela mufumeli wa Marandzi. Ambari vathu va tigoni gwago avo va golago dzihanyi, va na soma matshari khavo va gu ya tadzisa giwoniso gegi, aholu kha va na dugelela.

¹⁵ Mufumeli wa Wuronga a nata randrela lidhoropa a wungedzela mafu ma khala sigomo nya gulite khumo a sasela lidhoropa nya likhokhola. Masotshwa ya Marandzi ma nata zama gu dwana, aholu kha va na dugelela; ambari na va hathede dzindrena dza tigoni gwawe vata nadzo, kha va na ngata mana tshivba nya gupale.

¹⁶ Khu guralo, uye a natago guta mu sasela a na gira iso a si golago; nyamba himbedzwa khu muthu. A na bela Tigoni nya tshivba a li sasela.

¹⁷ A na dzi emisela khu tshivba yatshavbo nya mufumo waye, aholu uye a naya lomba gurula ni mufumeli wa Marandzi. A na mu ninga nyamahegyane waye a khala mwangadzi waye gasi a kodza gu mbembisa mufumo waye, aholu makungo yaye kha ma na mu phasa gilo.

¹⁸ Khu guralo, a na bwelela ga mayigo ya bambe nya yiphwa aya wandra wungi nya ayo, aholu, moyo nya ndruna a na degudza guvivba gwaye, gu thegela hungoni gwaye.

¹⁹ A na zama gu sihala makhokholani ya tigoni gwaye, aholu va na mu tugula, va mu songa, a fuvisa muphelo.

²⁰ Wulangani gwaye, a na emiswa mumbe mufumeli, uye a na rumela ndruna yaye guya phanga gyuma gya nyumbani nya wudhumo nya mufumo, aholu, khu matshigu madugwana a na mbembiswa nyamba zondrwa ambari gu dwaniswa.

²¹ Khu hwane gwaye, a na emiswa mwama nya nyalidede, uye a nga bani nari mwalo fanelo nya gufume; uye a nata na va divade, ata dzega wufumu khu mano.

²² A na pala dzinyimbi dzi mu saselago a dzi phalalegisa mbeli gwaye; va na mbembiswa gumogo ni muthangeli nya gidzumeledzwano.

²³ Uye a na gu girago naye gidzumeledzwano, a na mu kanganyisa; nari ni masotshwa nya madugwana a na pala a dzega wufumu.

²⁴ A na varamela na va pfhade malangani nya gunone nya sipandrengulu nya litigo, ata gira iso nya gu ambari vababe vaye kha va si kodza gu gira, ambari ni vakokwe vaye; a na dzega silo a nga phangago a kavedzela dzipari dzaye. A na gira ni makungo nya gusasele mambe makhokhola, aholu a na bani nari sa gikhatinyana basi.

²⁵ Khu monyoni gwaye a na dzipwa na tiyide, gasi guya dwana ni mufumeli wa Marandzi, aholu uye nuye mufumeli wa Marandzi, a tombanisa masotshwa nya gutale ngudzu aya dwana naye, aholu kha na nga dugelela, kholu a na mu girela makungo.

²⁶ Ambari ni avo va hodzago naye, va na mu vbedza tshivba, masotshwa yaye ma na phalalega, va na thega nya vangi khu gu songwa.

²⁷ Vafumeli vava navo va vavili, va na bani vari ni myonyo nya guvivbe, va na khala meza mweyo, va ganela malipha, aholu malipha yawe kha ma na phasa gilo. Kholu, mahegiso gu nata khu gikhati gya sa viredwago.

²⁸ Khu guralo, mufumeli wa Marandzi a na bwelelela tigoni gwaye nari ni thomba nya yingi, monyoni gwaye nari ni makungo nya guwugele gidzumeledzwano nya guage. Uye a na gira isoso nasi gu bweleli tigoni gwaye.

²⁹ Khu gikhati gi emisidwego, a na wuya ata dhumela mufumo wa Marandzi, aholu ga egi gikhati handro waye kha wu na ngata fanana ni guhegulani.

³⁰ Kholu vathu nya gute khu Kitimi, va nata khu dzingalava vata dwana naye, va mu vbedza tshivba, a thava. Aholu nari ndzilani, a na bwelo khavbo a wugela gidzumeledzwano nya gukatege, a gira iso si godwago khu monyo waye, a bwelo khavbo a pwanana ni vale va digidego gidzumeledzwano nya guage.

³¹ Gu na duga masotshwa yaye nya gukari, ma nyenyezisa nyumba nya miphaso, gumogo ni likhokhola, va fuvisa ni phaso nya litshigu ni litshigu, va thela manyala nya guthise.

³² Khu mano yaye, a na kanganyisa vale va ndragidego gidzumeledzwano, aholu vale va mutigo Nungungulu wawe, va na mana tshivba va tiya va gira siliwugiso.

³³ Vbakari gwawe, vale vatigo, va na hevbudza nya vangi, aholu khu gikhati nya gukari, va na sasedwa khu matshari ni nilo, va yiswa wugumbitunu, ni gu wandredwa silo sawe.

³⁴ Avbo va na gu thegago, va na mana giphaso nya gidugwana, aholu avo nya vangi va na ganela basi khu likana khavo vomo gumogo navo.

³⁵ Aholu vambe va nya guti, va na songwa gasi gu lingwa, ni gu agiswa kala gikhati nya mahegiso, kholu guhegisa gu na vboha khu gikhati gi emisidwego.

³⁶ Mufumeli a na gira gukhedza khu iso a na si golago, a na dzi khusedza ni gu dzi dandrisa mbeli ga vambe vanungungulu; gumogo ni ga Nungungulu nya vanungungulu, a na ganela sihonohono nya guthise. A na andra, kala gu tadzisega likhulo, kholu sile si hungidwego, si na tadzisega.

³⁷ Kha na thela kota khu vanungungulu va vababe vaye, ambari gu thela kota khu gugola ga vanyamayi, ambari ni wevbini nungungulu, kholu a na dzi dandrisa ga vatshavbo.

³⁸ Aholu, wulangani ga vanungungulu, a na khozela basi nungungulu nya makhokhola; nungungulu a nga ne gu tidwa khu vababe vaye; a na mu girela miningelo nya ndralama, ni parata, ni siwindri nya lisima ni silo nya gutsakise.

³⁹ A na vhikela makhokhola yaye khu gu phasedzedwa khu nungungulu wa va nya mayigo, avo va na gu mutigo, va na mu zundza ngudzu. A na va khusedza a va gira vathangeli va fumela nya vangi, a va kabanisela malanga khu gu va rengisela.

⁴⁰ Khu mahegiso nya gikhati, mufumeli wa Marandzi a nata dwana naye, aholu mufumeli wa Wuronga a na mu khinga khu dzikareta, vakhileli nya dzikavalu ni dzingalava nya dzingi. A na bela mayigoni a va kukuluta nga ndrambi nya mati.

⁴¹ A na bela ni ga litigo li vbindrago yatshavbo khu wumburi, a sasela mayigo nya mangi, aholu Edhomi, Mowabhi ni vathu nya guthavisege nya sanana sa Amoni, va na vbuluga mandzani gwaye.

⁴² A na khusedza gyandza gyaye a sasela mayigo nya mangi, ambari ni Egipito kha na vbuluga.

⁴³ A na phanga dzithomba dzatshavbo dza Egipito, ndralama, parata ni satshavbo silo nya lisima si na lumba uye; va Libhiya ni Vaetiyopiya, va na mu landrela.

⁴⁴ Aholu mahungu ma na gu dugago khu Khugadambo ni Wuronga, ma na mu pila hwambo, uye a na goroga a khuga na tade khu giviti, gasi guya sasela ni gu mbembisa vathu nya vangi.

⁴⁵ A naya tsitsa mitshatsha yaye nya wufumu vbakari nya linene ni gigomo nya gukatege. Aholu mahegiso gwaye gu nata, nyamba mana muthu nya gu mu lamulele gu mu lamulela.