Dhaniyeli 1 - Bhibhiliya Nya Guage

I. MATIMO YA DHANIYELI Dhaniyeli ni dzipari dzaye

¹ Khu mwaga nya wuraru nya gufume ga Jowakimi, mufumeli wa Judha, Nabhukodhonosori, mufumeli wa Bhabhiloni, a dita dhumela lidhoropa la Jerusalema a li sasela.

² Pfhumu a di ningela Jowakimi mandzani gwaye. Mufumeli wa Bhabhiloni a di dzega mufumeli wa Judha a gu hongola naye tigoni ga Sinari, gumogo ni gipandre nya sombo sa Nyumbani ga Nungungulu, a si yisa nyumbani ga nungungulu waye, aya si vega nyumbani nya thomba ya nungungulu waye.

³ Mufumeli a di rumela Asipenazi, muthangeli nya sithumi nya mufumo waye, gu mu resela madzaha ma dugelago nyumbani nya wufumu wa Israyeli, ni ayo nya gudugele nyumbani nya manganagana.

⁴ Madzaha nyamba hasa, nya wumburi, va hevbudego, nya gugengele ni guti, na vari ni mapimo, na va vbelede gululama, na va hevbude ni tshivba, gasi guya vegwa nyumbani nya wufumu, va hevbudzwa milowo ni lidimi nya Vakalidhiya.

⁵ Mufumeli a di va ninga navo va hodza guhodza ni gu sela wadwa wu sedwago khu mufumeli, gasi va vbedza myaga miraru na va gu hevbudzwa, khu hwane nya ugo, gasi va khala vathumegeli va mufumeli.

⁶ Vbakari gwawe, gu di manega vambe va nga bani va gu lumba lifumbu la na Judha, a gu ava: Dhaniyeli, Hananiya, Misayeli ni Azariya.

⁷ Muthangeli nya sithumi sa mufumeli, a di va thangisa mambe malina, a gu aya: Dhaniyeli a mu riya lina la Bhalitazari, Hananiya, khuye khu Sadraki, Misayeli khuye khu Misaki, Azariya khuye khu Abhedhi-Negho

⁸ Dhaniyeli a di funga khu monyoni gwaye gumba dzi nyenyezisa khu gu hodza ni gu sela vhinya yi sedwago khu mufumeli, khu guralo, a di ya lomba ga muthangeli nya sithumi gu mu dzumedzisa gumba hodza, gasi a si dzi nyenyezisi khiso.

⁹ Khu tshivba ya Nungungulu, gilombo gya Dhaniyeli gi di hakhwa khu muthangeli nya mithenwa.

¹⁰ Aholu, muthangeli a di ganela ga Dhaniyeli, khuye: “Nyi ngu thava mufumeli, mune wangu gukheni a nga nyi songa, kholu khuye a nyi leletedego gu mi ninga guhodza ni wadwa wanu. Gasi mwa gumba hodza ni gu sela, mu na wondra mu hambana ni mambe madzaha nya tanga yanu, a nyi rwega nandru nya gukhuye kha nya mi ningani guhodza ni gusela gu enedego.”

¹¹ Khavbo avbo, Dhaniyeli a di ganela ni ndruna yi nga vegwago khu muthangeli nya sithumi gasi gu sayisa Dhaniyeli, Hananiya, Misayeli ni Azariya, khuye:

¹² “Nga linga, sithumi sago si ngu lomba, u yedza gu hi ninga tongwe hi hodza uwo, ni gu sela mati basi gipimo nya likhumi matshigu.

¹³ Hwane nya ugo, u na pimanisa dzikhovbe dza ethu hi hodzago mitongwe ni dzikhovbe dza madzaha ma hodzago guhodza nya manonwa ya mufumeli, khavbo u na gu dzi kodza gu gira gugola gwago ga ethu sithumi sago.”

¹⁴ A di dzumela gilombo gyawe a va linga gipimo nya likhumi matshigu.

¹⁵ Hwane nya likhumi matshigu, gu di wonega dzikhovbe dzawe nari idzo dzi khalegidego gwadi, na va enide gwadi guvbindra madzaha ma nga bani ma gu hodza guhodza ga nyumbani ga mufumeli.

¹⁶ Khu guralo, ndruna yi di pila guhodza ni gu sela wadwa gu nga laywa khu mufumeli, yi va ninga tongwe.

¹⁷ Nungungulu a di ninga madzaha yaya nya mana, guti ni gu pimisa ni wugengeli nya milowo yatshavbo. Gu diga nya isoso, Dhaniyeli a di mana mapimo nya gutshamusele mafumbu yatshavbo nya siwoniso ni dzindroro.

¹⁸ Na gu vbindride gikhati gi nga vegiswago khu mufumeli gu vaya mu bikela, muthangeli nya mithenwa a di va yisa mbeli ga Nabhukodhonosori.

¹⁹ Mufumeli a diya bhula navo, aholu li mwalo lidzaha li nga bani li tsakisa gu fanana ni Dhaniyeli, Hananiya, Misayeli ni Azariya; khu guralo, va di hathwa gu thumela nyumbani ga mufumeli.

²⁰ Mahunguni gwatshavbo nya wugengeli ni guti, gu di manega avo na vari mbeli likhumi dzinyondro guvbindra dzinyanga ni valoli nya dzisolo dza tigoni gwaye gwatshavbo.

²¹ Dhaniyeli vbanyide kala mwaga a phedego khuwo gufuma mufumeli Kiro.