Amosi 5 - Bhibhiliya Nya Guage

Vbindrugedzani mu vbweta Nungungulu mu na mana guvbanya

¹ Yingisani magana yaya nya gililo, enu nyumba ya Israyeli.

² Likendzi la Israyeli li thegide, gima kha li na wuga gambe; li di labalaba mafuni, mwalo ni moyo nya gu li wuse.

³ Kholu Pfhumu Nungungulu a ngu ganela kharati, khuye: “Lidhoropa lile li dugago ni likhumi mazana guya dwana nyimbi, li naya tshala ni lizana, ni lile li na rumelago lizana, li na tshala ni likhumi va nyumbani ga Israyeli.”

⁴ Kholu Pfhumu Nungungulu a ngu ganela kharati ga nyumba ya Israyeli, khuye: Nyi vbweteni gasi mu mane guvbanya!

⁵ Aholu mu nga vbwetini Bheteli, ambari guyani Giligali, ni guvbindra muya Bherisebha, kholu Giligali, a na sasedwa a yiswa wugumbini, Bheteli a na pfhungumudwa a si khali gambe gilo.

⁶ Vbwetani Pfhumu Nungungulu, mu na vbanya; gasi a si thegeli ga nyumba ya Josefe kha nga nilo, a yi mbembisa, gu si manegi dhoropani ga Bheteli muthu nya gu wu tshime.

⁷ Enu mu vbindrugedzago lisine li khala wuhungu, gululama mu gu vbaladza vbavbatshi.

⁸ Vbwetani uye a nga gira tshangano nya dzinyeledzi ni thandra nya masase; uye a vbindrugedzago gidema gi khala guwonegela nya dzimindrudzile, mihani gu vbindrugedza gu khala wutshigu, uye a ranago mati ya linene a ma guhula vbatshani nya mafu; lina laye khuye Pfhumu Nungungulu.

⁹ Uye a resago gumbembiswa ga muthu nya tshivba khu githugedza, a khungumula makhokhola ma khala marumbi.

¹⁰ Va gu nyenya oyu a va kawukago phathani, va tsorodzela oyu a ganelago lisine.

¹¹ Khu guralo, kha nga olu mu gandredzelago gisiwana, mu gi gurumedza gu livba gikhaba nya tirigu. Khu guralo, mu na vbahani dzinyumba nya siwindri nya guvatwe, aholu kha mu na khala umo; mu limani marembwe nya miuvha mu ma golago, aholu kha mu na sela wadwa wakone.

¹² Kholu nyi ngu guti guvivba gwanu gukheni gungi, ni sihoso sanu si tade; enu mwa gu tshanisa muthu nya gululame, mu dzumela gu rengeledwa, mu hembulula vahamugi miphathani.

¹³ Khu guralo, oyu a gengedego, a na degule, kholu gikhati gi na bani givivbide.

¹⁴ Vbwetani ugo gu gu gwadi nasiri ugo nya guvivbe, gasi mu kodze guvbanya; khu kharato, Pfhumu Nungungulu nya Tshivba Yatshavbo, a na bani nari nanu, kha nga guganela gwanu.

¹⁵ Nyenyani guvivba, mu gola wuwadi; mu tiyisa lisine gulamulani gwanu. A gu dzina saye Pfhumu Nungungulu nya Tshivba Yatshavbo, a na pwela gisiro mitshaledwa ya Josefe.

¹⁶ Khu guralo, Pfhumu Nungungulu nya Tshivba Yatshavbo, uye a gu Pfhumu a ngu ganela kharati, khuye: Dzindzilani gwatshavbo gu na manega gililo, ni mitalalani va na ganela, khavo: Yowe! Yowe! Va na rana mulimi gasi guta lila, ni vatshavbo avo va kodzago gulila.

¹⁷ Marembweni gwatshavbo gu na manega gililo; kholu nyi na vbindra khu vbakari gwago, a ngu ganela Pfhumu Nungungulu.

Litshigu la Pfhumu

¹⁸ Libango ga vale va vbwetago gu wona litshigu la Pfhumu Nungungulu! Mwa gu li vbwetela ginani gu li wonani litshigu leli la Pfhumu Nungungulu? A na bani nari litshigu nya gidema, nyambana wenengedzo.

¹⁹ Li na gira kha nga muthu a thavago mbeli nya nghala, bwelo khavbo a manana ni gikankanka, mwendro gu muthu a gu bela nyumbani gwaye, mandza yaye a gu phara vbandzaritunu a hodzwa khu nyoga.

²⁰ Ina litshigu la Pfhumu Nungungulu kha li na khala nari la gidema nasiri la gu wonegela, gani? Kha li na khala gidema nyambana wenengedzo ni wudugwana, gani?

²¹ Nyi ngu vengana ni gu nyenya mibuzo yanu, ni mitshangano yanu nya mikhuwo, gima kha yi nyi tsakisi.

²² Ambari mwa gu nyi ningani miphaselo nya guvbiswe, ni miningelo nya guhodze, gima kha nyi na tsaka khiyo, ambari miningelo yanu nya gugirwe khu sirengo sanu nya gunone.

²³ Digani ligwaha lanu nya dzindzimo, kholu kha nyi vbweti gupwa wutsendze nya mihwambi yanu.

²⁴ Aholu lisine li na goge kha nga mati, ni gululama gu fanana ni gitsongwana nyamba vbwa.

²⁵ Enu va na Israyeli, avbo mu nga bani muri giwulani gipimo nya magumana myaga, ina mu di gu nyi girela miphaso nya guhodze, gani?

²⁶ Ina, mu na rwala tshatsha wa mufumeli wanu, gifananiso ni nyeledzi ya nungungulu wanu, esi mu nga dzi girelani enu mwabune.

²⁷ Khu guralo, nyi na mi yisa wugumbitunu tshatugo wa Dhamasiko, a ngu ganela Pfhumu, oyu lina laye a gu Nungungulu nya Tshivba Yatshavbo.