Amosi 1 - Bhibhiliya Nya Guage

Gubikela

¹ Magana ya Amosi, a nga bani nari moyo nya vahavisi va Tekowa, a ma wonidego khu giwoniso mayelano khu Israyeli, matshiguni ya Uziya, mufumeli wa Judha, ni matshiguni ya Jerobhowamo, mwamana wa Jowasi, mufumeli wa Israyeli, myaga mivili gu si gu manegi girevareva.

² Uye a di ganela, khuye: “Pfhumu Nungungulu a na bhonga khu Siyoni, a pwadza lito laye khu Jerusalema; gu manega gililo wuhaviseloni ga vahavisi, gubanga tshokatunu nya gigomo gya Karimelo.”

³ Pfhumu Nungungulu a ngu ganela kharati, khuye: “Khu kotani nya sighoho siraru sa Dhamasiko mwendro sina, kha nyi na bweledza tsayiso, kholu va khothede Gileyadhi, va mu gonya khu migonyo nya dzisimbi.

⁴ Khu guralo, nyi na rotha nilo ndrangani ga Hazayeli, wu na gu vbisago makhokhola ya Bheni-Hadhadhi

⁵ Nyi na fanyeledzela migonyo ya Dhamasiko, nyi mbembisa vavbanyi va Bhekiyati-Avheni, ni wule a pharago ndronga nya wufumu wa Bheti-Edheni; vathu va Siriya va na yiswa wugumbitunu tigoni ga Kiri, a ngu ganela Pfhumu Nungungulu.

Gusasedwa ga Vafilisitiya

⁶ Pfhumu Nungungulu a ngu ganela kharati, khuye: “Khu kotani nya sighoho siraru sa Gaza mwendro sina, kha nyi na bweledza tsayiso, kholu va dzegide vathu va va yisa wugumbini, gasi vaya va rengisa ga Edhomi.

⁷ Khu guralo, nyi na rotha nilo mabhiyoni ya Gaza, wu vbisa dzinyumba nya wufumu.

⁸ Nyi na mbembisa vavbanyi va Asidhodhi, ni wule a pharidego ndronga nya wufumu wa Asikaloni. Nyi thawuludza gyandza gyangu nyi veta Ekoroni, kala gufa ni yatshavbo mitshaledwa nya Vafilisitiya, a ngu ganela Pfhumu Nungungulu.

⁹ Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Tiro, kha nyi na bweledza tsayiso, kholu yiside gidzemo nya vathu wugumbini aya va rengisa ga Edhomi, nyamba alakanya gidzumeledzwano nya wundruye.

¹⁰ Khu guralo, nyi na khondrisa mabhiyo ya Tiro khu nilo, wu vbisa dzinyumba dzawe nya wufumu.”

¹¹ Pfhumu Nungungulu a ngu ganela kharati, khuye: Khu kotani nya sighoho siraru mwendro sina sa Edhomi, kha nyi na bweledza tsayiso, kholu lundride ndriyaye khu litshari, a mu tshanisa nyamba mu pwela wusiwana, a simama gu khala ni giviti khuye gikhati gyatshavbo.

¹² Khu guralo, nyi na rotha Temani khu nilo, wu vbisa dzinyumba nya wufumu dza Bhozira.

¹³ Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa va na Amoni, kha nyi na bweledza tsayiso, kholu va pferulede dzimimba dza vanyamayi va Gileyadhi, gasi guanamisa litigo lawe.

¹⁴ Khu guralo, nyi na rotha khu nilo mabhiyo ya Rabha, wu vbisa dzinyumba dzawe nya wufumu, gu wombwa dzihuwa khu litshigu nya nyimbi, gu fanana ni gipupwane litshigu nya gingulu.

¹⁵ Mufumeli waye a na vbagedwa a yiswa wugumbitunu, uye gumogo ni dzindruna dzaye,” a ngu ganela Pfhumu Nungungulu.