3 Johane 1 - Bhibhiliya Nya Guage

Gulosa

¹ Eni, lidhota nya Libandla, nyi ngu losa Gayo nyi mu golago khu lisine.

² Gigodwa gyangu, nyi ngu lombelela gukheni u vbanye gwadi womi wago kha nga edzi u gu wadi khidzo hefemuloni.

³ Kholu nyi nengede ngudzu khu gikhati va ngatago vambe vandruye vata nyi embela gukhavo uwe u tumbegide lisineni, ni gukhavo wa gu vbanya mulisineni gikhati gyatshavbo.

⁴ Gi mwalo gi nyi tsakisago guvbindra gupwa gupwani sanana sangu si ngu vbanya khu gu landra lisine.

Wuzundzo ga Gayo

⁵ Gigodwa gyangu, gira khu gu tumbega ga satshavbo esi u girelago vandruye, ngudzungudzu vawuyi.

⁶ Avo va ngu ganela vbakari nya Libandla khu mahungu nya lihaladzo lago. Gira wuhindzi u phasedza vathu vovo gu simama ni liendro lawe khu magirelo nya gutsakise Nungungulu.

⁷ Kholu avo va phede liendro lawe khu Lina laye, nyamba dzumela gu hakha giphaso gya va nya mayigo.

⁸ Ethu hi ngu yela gu hakha vathu vovo. Kharato hi na hengela navo thumoni wawe nya gutivise lisine.

Dhiyotrefe ni Dhemetriyo

⁹ Eni nyi lovide lidangalila ga libandla, aholu Dhiyotrefe kha khathali khu esi nyi ganelago kholu a gu gola gu ruma uye.

¹⁰ Khu guralo, gikhati nyi na vbohago iyoyo, nyi nata mu kawuka, khu kotani nya esi a girago; khu kotani nya silo nya guthise ni malipha a ganelago khu ethu. Aholu, kha tsaki basi khu gu gira isoso, kholu va gu vboha vandruye, uye kha va hakhi. Mumbe muthu a gu vbweta gu va hakha, uye kha mu dzumedzisi, gambe a gu mu tutumisa muthu yoyo ndrani nya libandla.

¹¹ Gigodwa gyangu, uwe pimedzela esi nya sadi, nasiri esi nya guvivbe. Uye a girago gwadi khwa Nungungulu, uye a girago guvivba, gima a si gu mu woni Nungungulu.

¹² Vathu vatshavbo va gu zundza Dhemetriyo. Ambari lisine nilo li ngu mu zundza. Ethu nethu hi ngu mu zundza. Uwe u ngu dziti gukhuwe esi hi ganelago lisine.

Malosedzela nya guhegise

¹³ Nyi ngari ni singi nyi vbwetago gu gu embela, aholu, kha nyi vbweti guya khu gu lova.

¹⁴ Nyi ngu tumba guta wonana nago nyamba hwela, khavbo hi na guta bhulago giwoni ni giwoni.

¹⁵ Gurula gu na khale ni uwe. Dzipari dzago dzatshavbo dzi ngu gu losedzela. Losedzela moyo ni moyo nya dzipari dzathu.